Тошкент шаҳрининг Янгиҳаёт туманида пиротехника воситалари сабаб 24 ёшли йигит кафтидан айрилди. Бу ҳақда пойтахт Ички ишлар бош бошқармаси хабар берди.
Маълум қилинишича, Янгиҳаёт туманида 24 ёшли йигит пиротехника воситалари портлаши оқибатида оғир тан жароҳатлари олган. ИИО маълумотларига кўра, йигитнинг қўл панжаси жиддий шикастланган ва бармоқларининг бир қисми ампутация қилинган.
Беморнинг онасига кўра, у уй ишлари билан машғул бўлиб турган бир пайтда, гумбурлаш овозини эшитиб қолган ва ташқарига югуриб чиққан.
“Борсам, ўғлим ўзи чиқиб келaётган экан қўлини ушлаб. Кўрганимда қўли қон эди, юзи ҳам қонаб турганди. Ўзим қўрқиб кетдим. Ҳозир ҳолати яхши, қўлидан бошқа жойига жароҳат етмаган”, деган беморнинг онаси.
Шифокорнинг сўзларига кўра, оғир жароҳатлар сабаб йигитнинг кафт қисми олиб ташланган.
“Чап билак суяклари очилиб, майдаланиб, синиб, қон-томир ва нервлари жароҳатланиши, кафт соҳаси эзилиб йиртилган жароҳати, ўнг қўл билак ва кафт соҳалари, юз соҳалари куйган жароҳатлари билан келди. Бемор оғир шок ҳолатда олиб келинган. Жарроҳлик амалиётида чап қўл томирлар тўлиқ узилиши, нервлари узилиши ва суяклари майдаланиб cинганлиги, юмшоқ тўқималарнинг ҳолатини ҳисобга олиб, беморнинг қўл кафти олиб ташланди”, деган шифокор.
