“Формула-1” пойгаларининг етти карра чемпиони Михаэль Шумахер “Формула-1” тарихидаги энг бой ҳайдовчи деб топилди. Бу ҳақда “Racing News 365” нашри хабар берди.
Манбага кўра, Шумахернинг соф бойлиги 790 миллион долларга баҳоланган. Германиялик ҳайдовчи фаолияти давомида 91 та ғалаба қозониб, етти марта “Формула-1” чемпионлигини қўлга киритган.
Иккинчи ўринни етти карра “Формула-1” чемпиони, буюк британиялик Льюис Хэмилтон эгаллаган, унинг бойлиги 304 миллион долларни ташкил этди. Икки карра чемпионлик совриндори, “Астон Мартин” пойгачиси, испаниялик Фернандо Алонсо эса рейтингда 264 миллион долларга баҳоланган бойлик билан учинчи ўринда жойлашган. Тўртинчи ўринни битта чемпионлик ғалабаси билан финляндиялик Кими Райкконен (254 миллион) эгаллаган. Уч карра чемпион бўлган австриялик Ники Лауда (203 миллион) бешинчи ўринни банд этган.
Маълумот учун, Михаэль Шумахер “Формула‑1”да 1991–2012 йиллар оралиғида фаолият юритган. У дастлаб “Жордан” жамоасида дебют қилган, кейинчалик “Бенеттон”, “Феррари” ва “Мерседес” жамоаларида ҳайдовчилик қилган.
