Лондоннинг “Челси” клуби ҳужумчиси Раҳим Стерлингнинг уйи талон-торож қилинди. Ҳодиса 8 ноябрь, шанба куни соат тахминан 18:30 атрофида юз берган. Бу ҳақда The Telegraph нашри хабар берди.
Манбага кўра, бу пайтда футболчи оиласи билан уйда бўлган ва ҳеч ким жароҳат олмаган. Ниқобли шахслар Раҳимнинг уйига киришга уринган, бироқ ҳодисанинг қолган тафсилотлари ҳозирча аниқ эмас. Шунингдек, гумонланувчиларнинг шахси аниқланган, бироқ улар аллақачон мамлакатдан чиқиб кетган, дея хабар беради Daily Mail нашри.
“Биз тасдиқлай оламизки, Раҳим Стерлингнинг уйи ҳафта охирида талон-торожга учради. Ҳодиса пайтида у ва болалари уйда бўлган. Биз шукр қиламизки, Стерлинг ва унинг яқинлари хавфсиз. Шу мураккаб паллада уларнинг шахсий ҳаётига ҳурмат билан ёндашилишини сўраймиз”, дейди футболчининг вакили
Стерлингнинг уйига ўгри тушиш ҳолати илк марта кузатилмаяпти. 2022-йилда ҳам бу каби ҳолат содир бўлган, ўша пайтда уйнинг ичида ҳеч ким бўлмаган. Ҳодиса сабаб Стерлинг Қатардаги Жаҳон чемпионати 1/8 финал босқичи доирасидаги Сенегалга учрашувини (3:0) ўтказиб юборган.
