Бухоро вилоятида ўтказилган рейд тадбирларида 211 та маъмурий жаримаси бор автомобиль топилди. Бу ҳақда Мажбурий ижро бюроси ахборот хизмати хабар қилди.
Маълум қилинишича, Бухорода ўтказилган рейд тадбирлари давомида 2,6 миллиард сўмлик 114 та ижро ҳужжати бўйича қарздорлар номидаги 98 та автотранспорт воситаси жарима майдончаларига жойлаштирилиб, 70 та 741 миллион сўмлик ижро ҳужжатининг ижроси амалда таъминланган.
Маъмурий жарималарни ундириш бўйича олиб борилган ишлар давомида Ромитан туманида яшовчи фуқаро ўзига тегишли Tracker 2 автомобилини йўл ҳаракати қоидаларига риоя қилмасдан бошқариши оқибатида 211 та қоидабузарлик содир этгани аниқланган. Унинг жами 137 миллион сўмлик маъмурий жаримаси бўлган.
Қидирув тадбирлари давомида ушбу автомашина топилиб, вақтинча сақлаш учун жарима майдончасига жойлаштирилган. Ҳозирда қарздорларга тегишли бўлган қидирувдаги автотранспорт воситаларини аниқлаш борасидаги рейд тадбирлари давом этмоқда.
