Фарғона вилоятининг Учкўприк туманида оилавий жанжал вақтида хотинининг опасига ошхона чопқиси билан тан жароҳати етказган эркак 5 йилга озодликдан маҳрум қилинди. Бу ҳақда “Миллар” дастури хабар берди.
Иш ҳужжатларига кўра, эр-хотин дастлаб телефонда жанжаллашган. Эркак хотинига уйга келишини ва уни кутиб туришини айтган. Аёл эса хонадонга опаси билан борган ва эр-хотин ўртасидаги жанжал уйда ҳам давом этган.
Жанжал вақтида эркак хотинига ошхона чопқиси билан жароҳат етказмоқчи бўлган. Бироқ чопқи уларни ажратишга уринган аёлнинг опасига теккан.
Жабрланувчи тан жароҳати олиб, шифохонага ётқизилган. Кўрсатилган тиббий ёрдам натижасида унинг ҳаёти сақлаб қолинган.
Жабрланувчи суд мажлисида ҳозир ҳам даволанаётганини маълум қилган.
Жиноят ишлари бўйича Учкўприк туман суди эркакни Жиноят кодексининг 104-моддаси 2-қисмининг “и” бандида (қасддан баданга оғир шикаст етказиш инсон аъзоларини ва тўқималарини олиш мақсадида) назарда тутилган жиноятни содир этишда айбдор деб топган.
Унга 5 йил муддатга озодликдан маҳрум қилиш жазоси тайинланган. Жазо умумий тартибли колонияда ўталиши белгиланган.
