Гиёҳвандлик воситаларининг ноқонуний айланмасига қарши курашиш доирасида Давлат хавфсизлик хизмати ходимлари томонидан Божхона қўмитаси билан ҳамкорликда ўтказилган тезкор тадбирда Россия Федерациясидан олиб келинаётган наркотик модда тўхтатиб қолинди.
Хусусан, Тошкент вилоятида жойлашган “Навоий” чегара божхона постига Қозоғистондан кириб келган, Бухоро шаҳрида яшовчи фуқаро бошқарувидаги Lada Largus автотранспорт воситаси тегишли тартибда текширувдан ўтказилди. Натижада автомашина юкхонасида бўлган, “Газель” русумли транспорт воситаси учун мўлжалланган узатмалар қутиси (“коробка передач”) ичида хуфиёна тарзда яширилган, 5 дона ўрамдаги, умумий оғирлиги 2 кг 300 граммни ташкил қилувчи “Мефедрон” синтетик наркотик моддаси борлиги маълум бўлди.
Аниқланишича, Ўзбекистон—Россия йўналишида киракашлик билан шуғулланувчи мазкур фуқаро ушбу автоэҳтиёт қисмни Тошкент вилоятида кутиб турган, 2000-йилда Қашқадарё вилоятида туғилган шахсга етказиши маълум бўлиб, тезкор тадбир давом эттирилди ҳамда буюртмани қабул қилиб олган вақтида у ҳам қўлга олинди.
Ҳозирда мазкур шахсларга нисбатан Жиноят кодексининг 246-моддаси 2-қисми (контрабанда) ва 273-моддаси 5-қисми (гиёҳвандлик воситалари, уларнинг аналоглари ёки психотроп моддаларни ўтказиш) билан жиноят иши қўзғатилиб, қамоқ эҳтиёт чораси қўлланди.
2021-йилда 537 кило наркотик аниқланган бўлса, 2024-йилда бу кўрсаткич 1 тоннага ва 2025-йилнинг 11 ойи якунларига кўра, 1,6 тоннага кўтарилган. Ноқонуний муомаласига чек қўйилган моддалар таркибида табиий гиёҳвандлик воситалари устуворлик қилган. Бунда 1 191 кило гашиш, 259 кило опий ва 61 кило каннабис аниқланган. Шу билан бирга, кучли таъсир қилувчи психоактив моддалар ҳажмининг кескин ўсиши кузатилган. Ушбу муддатда 1,06 тонна дан ортиқ шундай моддалар мусодара қилинган бўлиб, улар орасида сибутрамин (879 кило), прегабалин (119 кило) ва габапентин (28 кило) каби препаратлар устунлик қилган.
