Хитой 25 декабрь куни АҚШни Пекин ва Деҳли ўртасидаги алоқаларнинг яхшиланишига халақит беришга уринаётганликда айблади. Бу ҳақда TRT World хабар берди.
Хитой Ташқи ишлар вазирлиги матбуот котиби Лин Сзян АҚШ Уруш вазирлиги (Пентагон) ҳисоботига муносабат билдирди. 23 декабрь куни эълон қилинган Пентагон ҳисоботида Хитой Ҳиндистон билан баҳсли чегарадаги кескинлик пасайишидан фойдаланиб, икки томонлама муносабатларни барқарорлаштиришга ва АҚШ-Ҳиндистон алоқалари чуқурлашишига йўл қўймасликка ҳаракат қилаётгани айтилган эди.
Лин Сзян Пекин Ҳиндистон билан муносабатларга стратегик ва узоқ муддатли истиқболда қарашини таъкидлади.
More stories“Чегара масаласи Хитой ва Ҳиндистон ўртасидаги ички иш бўлиб, Пекин ҳар қандай давлатнинг бу масалада ҳукм чиқаришига қаршилик билдиради”, деди матбуот котиби.
2020-йилги кескинликдан кейинги яқинлашув
Икки давлат ўртасидаги муносабатлар 2020-йилда Ҳимолай чегарасидаги ҳарбий тўқнашувдан сўнг кескин ёмонлашган эди. Бироқ сўнгги бир йил ичида вазиятни барқарорлаштириш бўйича қатор қадамлар ташланди. Кўп босқичли ҳарбий ва дипломатик музокаралар натижасида “Ҳақиқий назорат чизиғи”да тинчлик ва осойишталикни сақлашга қайта урғу берила бошланди.
Хусусан, 2025-йилда кўп томонлама саммитлар доирасида Хитой раиси Си Цзиньпин ва Ҳиндистон бош вазири Нарендра Моди учрашув ўтказди. Унда ҳар икки етакчи Пекин ва Деҳли бир-бирига рақиб эмас, балки ҳамкор сифатида қараши лозимлигини, мавжуд келишмовчиликлар умумий муносабатларни белгилаб бермаслиги кераклигини билдирди.
Амалий ҳамкорлик қайтмоқда
Дипломатик муносабатлар ҳам жонланмоқда: бир неча йиллик чекловлардан сўнг чегара масалалари бўйича махсус вакиллар ва вазир ўринбосарлари даражасидаги мулоқотлар қайта тикланди. Дипломатиядан ташқари, амалий соҳаларда ҳам сезиларли ўзгаришлар кузатилмоқда.
Жумладан, узоқ танаффусдан сўнг Хитой ва Ҳиндистон ўртасида тўғридан-тўғри йўловчи авиарейслари қайта йўлга қўйилди. Пекин ҳиндистонлик сайёҳлар ва тадбиркорлар учун виза тартибини соддалаштириш чораларини кўрди. Экспертларнинг фикрича, ушбу қадамлар бизнес ва туризм соҳасидаги алоқаларни тиклашга хизмат қилади.
