Ўзбекистон ва Гонконг ўртасида ўзаро визасиз режимни ўрнатиш режалаштирилмоқда. Бу ҳақда ташқи ишлар вазири Бахтиёр Саидов маълум қилди.
3 июнь куни вазир Тошкентда Гонконг махсус маъмурий ҳудуди администрацияси раҳбари Жон Ли Каччиу билан учрашди. Музокаралар давомида инвестициялар, молия, рақамлаштириш, сунъий интеллект, транспорт ва логистика соҳаларидаги истиқболли йўналишлар муҳокама қилинган.
Гонконгнинг халқаро молия ва бизнес маркази сифатидаги тажрибаси ҳамда салоҳияти Ўзбекистон иқтисодиётини модернизация қилиш ва илғор лойиҳаларни рўёбга чиқаришда муҳим ўрин тутишини таъкидланди.
Шунингдек, ҳудудлараро шерикликни ривожлантириш, ишбилармон доиралар ўртасидаги бевосита мулоқотларни кенгайтириш ва қўшма ташаббусларни илгари суриш масалалари юзасидан фикр алмашилган.
“Гонконг раҳбарининг юртимизга ташрифи Ўзбекистон–Хитой ўртасидаги барча шароитларда ҳар томонлама стратегик шериклик муносабатларини янада мустаҳкамлаш ҳамда мамлакатимиз билан Гонконг ўртасидаги алоқаларни янги мазмун билан бойитишга хизмат қилишини қайд этдик”, деди Бахтиёр Саидов.
Учрашув давомида ўзаро визасиз режимни ўрнатиш тўғрисидаги ҳукуматлараро битимни тузиш нияти бўйича вербал ноталар алмашилган. ТИВ раҳабарининг қайд этишича, мазкур қадам фуқаролар учун қўшимча қулайликлар яратиб, ўзаро алмашинувларни фаоллаштиришга хизмат қилади.
Жон Ли Каччиу Facebook’даги саҳифасида аниқлик киритишича, визасиз режимни 30 кунгача бўлган муддатга жорий этиш режалаштирилмоқда. Унинг таъкидлашича, томонлар эришилган келишувларни имкон қадар тезроқ амалга ошириш учун саъй-ҳаракатларни давом эттиради.
Шунингдек, Гонконг маъмурияти раҳбари қисқа муддатли сафарлар учун визаларнинг бекор қилиниши туризм, таълим ва бизнес алоқаларининг ривожланишига хизмат қилишига, шунингдек узоқ муддатли иқтисодий ва савдо ҳамкорлиги учун мустаҳкам замин яратишига ишонч билдирди.
Ҳозирда Гонконг махсус маъмурий ҳудуди паспорти эгалари Ўзбекистонга 10 кунгача визасиз кира олади. Ўзбекистоннинг дипломатик ва хизмат паспорти эгалари Гонконгга 14 кунгача визасиз ташриф буюриши мумкин, оддий паспорт эгалари эса Гонконгга бориш учун виза олиши шарт.
