Германиянинг Вайссенхаус курортида шахмат бўйича нуфузли Freestyle Chess Жаҳон чемпионати ҳал қилувчи босқичга кирди. Мусобақада Ўзбекистон шарафини ҳимоя қилаётган Нодирбек Абдусатторов ҳамда Жавоҳир Синдоров навбатдаги учрашувларини ўтказди.
Ярим финал: Абдусатторов ва Карлсен қаршилиги
Кучли тўртликдан жой олган Нодирбек Абдусатторов ярим финалда дунёнинг биринчи рақамли гроссмейстери Магнус Карлсен билан тўқнаш келди. Тўртта партиядан иборат баҳснинг дастлабки икки ўйини муросасиз кураш остида ўтди ва дуранг натижа билан якунланди. Аммо учинчи ва тўртинчи партияларда Карлсен ўз тажрибасини намойиш этди. Норвегиялик гроссмейстер ҳал қилувчи паллаларда устунликни қўлга олиб, умумий 3:1 ҳисобида ғалаба қозониб, финал йўлланмасига эга чиқди.
Иккинчи ярим финал учрашувида америкалик гроссмейстер Фабиано Каруана мезбонлар вакили Винсент Кеймерга қарши баҳс олиб борди. Тўртта партия якунига кўра Каруана 2,5:1,5 ҳисобида устун келиб, финал йўлланмасини қўлга киритди.
Шу тариқа, чемпионлик учун ҳал қилувчи баҳсда Магнус Карлсен ва Фабиано Каруана ўзаро тўқнаш келади. Ўзбекистонлик Нодирбек Абдусатторов эса учинчи ўрин учун Винсент Кеймерга қарши дона суради.
Синдоров 7-ўрин учун ўйнайди
5–8-ўринлар учун кечган баҳсда Жавоҳир Синдоров ҳиндистонлик Аржун Эригаисига қарши дона сурди. Дастлабки икки партия муроса билан якунланди. Бироқ учинчи ва тўртинчи ўйинларда Эригаиси устунликни қўлга олиб, умумий 3:1 ҳисобида ғалаба қозонди ва 5-ўрин учун курашни давом эттирадиган бўлди. Мазкур босқичдаги яна бир тўқнашувда Ҳанс Ниэманн тажрибали Левон Аронянни 2,5:1,5 ҳисобида мағлуб этди.
Шу тариқа, Жавоҳир Синдоров мусобақани 7-ўринда якунлаш учун Левон Аронянга қарши дона суради. Аржун Эригаиси эса 5-ўрин учун Ҳанс Ниэманн билан куч синашади.
Маълумот учун, турнирда 8 нафар шахматчи ўзаро ўйнади ва энг яхши 4 нафари ярим финалга ўтди, қолганлар эса 5–8-ўринлар учун курашади. Турнирнинг умумий мукофот жамғармаси 300 минг доллар бўлиб, ғолиб 100 минг доллар пул мукофотини қўлга киритади. 15 февраль, якшанба куни мусобақанинг финал ва 3-ўрин учун баҳслари бўлиб ўтади.
