Ички ишлар вазирлиги Тезкор қидирув департаменти томонидан Малайзиянинг Куала-Лумпур шаҳрида одам савдоси билан шуғулланиб келган уюшган жиноий гуруҳ фаолиятига чек қўйилди. Бу ҳақда ИИВ ахборот хизмати хабар берди.
Маълум қилинишича, 1971 йилда Тожикистонда туғилган аёл мазкур гуруҳга раҳбарлик қилган. У Ўзбекистонда яшовчи шериклари орқали Telegram тармоғида Куала-Лумпурдаги ресторанга “янги ходимлар ишга олинади” мазмунидаги эълонларни жойлаштириб, фуқароларни чет элга юборишни йўлга қўйган.
Гуруҳнинг Тошкентдаги аъзолари иш излаб мурожаат қилган шахслар билан учрашиб, уларни ёлғон ваъдалар билан Малайзияга жўнатган. Тергов маълумотларига кўра, аёл қўл остида ишлаш учун борган қизларни шаҳвоний эксплуатация қилган, йигитлар эса ваъда қилинган 500 доллар ойлик, бепул яшаш жойи ва озиқ-овқат билан таъминланмаган.
Шунингдек, жабрланувчиларнинг ишчи визалари расмийлаштирилмаган, маоши берилмаган ва паспортлари олиб қўйилиб, мажбурий меҳнатга жалб этилган. Ҳозирга қадар жиноий гуруҳдан жабрланган саккиз нафар шахс аниқланиб, ҳолат юзасидан Жиноят кодексининг 135-моддаси 2-қисми билан жиноят иши қўзғатилган, тергов ҳаракатлари давом этмоқда.
