Кеча, 27 апрель куни Буюк Британия Қироли Чарльз III ва унинг рафиқаси Қиролича Камилла расмий ташриф билан АҚШга борди. Бу ҳақда BBC хабар берди.
Уларни АҚШ Президенти Дональд Трамп ва мамлакат биринчи хоними Мелания Трамп Оқ уйда кутиб олган.
Бугун, 28 апрель куни Чарльз III АҚШ Конгрессининг ҳар икки палатаси олдида нутқ сўзлаши режалаштирилган. Бу Британия монархининг АҚШ парламентида тарихда иккинчи бор нутқ сўзлаши бўлади. Бундан олдин, 1991 йилда Элизабет II Конгрессда нутқ қилган эди.
Шундан сўнг Буюк Британия Қироли ва Қироличаси Нью-Йоркка бориб, 2001 йил 11 сентябрь терактлари қурбонларининг хотирасига бағишланган тадбирда иштирок этади.
Қайд этилишича, Британия монархининг АҚШга ҳозирги ташрифи 2007 йилдан бери биринчи марта амалга оширилмоқда.
Бу ташриф АҚШ ва Буюк Британия ўртасидаги муносабатларда жиддий инқироз кузатилаётган бир даврга тўғри келмоқда. Бу, жумладан, Трампнинг Европага нисбатан олиб бораётган ташқи сиёсати билан боғлиқ.
АҚШ Президенти эса, қиролнинг ташрифи шубҳасиз икки давлат ўртасидаги муносабатларни яхшилашига ишонч билдирган.
