Афғонистон Ташқи ишлар вазирлиги Ғазо секторига 530 тонна гуманитар ёрдам юборилганини маълум қилди. Бу ҳақда Ariana News хабар берди.
Инсонпарварлик ёрдами Мисрнинг Рафаҳ ўтиш пункти орқали етказилган. Ёрдам Афғонистон бош вазир девони кўрсатмаси асосида тайёрланган. Афғонистон делегацияси керакли буюмларни Мисрдан харид қилган.
Юк таркибига озиқ-овқат, кийим-кечак ва бошқа зарур буюмлар киради. Ёрдам 42 та юк машинасида ташилган ва тахминан 500 минг долларга баҳоланмоқда. У Ғазодаги 22 мингга яқин оилага тарқатилиши кутилмоқда.
Баёнотда таъкидланишича, Афғонистон халқаро ҳамжамиятни Ғазода доимий ўт очишни тўхтатиш режимини ўрнатиш учун самарали чоралар кўришга чақирди.
Ўзбекистон март ойида Афғонистонга гуманитар ёрдам юборганди
Март ойида президент Шавкат Мирзиёев топшириғи билан Рамазон ҳайити муносабати билан Афғонистон аҳолисига 17 та юк машинасида 300 тоннадан ортиқ озиқ-овқат ва бошқа зарур маҳсулотлар ортилган гуманитар юк етказилган.
Инсонпарварлик ёрдами таркибидан ун, гуруч, ярим тайёр гўшт (тушёнка), шакар, макарон ва қандолат маҳсулотлари, ўсимлик ёғи, тез тайёрланадиган таомлар, шунингдек, тўқимачилик маҳсулотлари ва йирик ҳажмли сув идишлари ўрин олган.
Афғонистондаги гуманитар инқироз, очарчилик даражаси ошмоқда
ЮНИСЕФ ҳисоботига кўра, Афғонистон дунёдаги энг йирик гуманитар инқироз ўчоқларидан бири бўлиб қолмоқда. Узоқ йиллик можаролар, иқтисодий қолоқлик, аҳолининг асосий хизматлардан етарли фойдалана олмаслиги ва ҳуқуқларнинг чекланиши фуқароларнинг катта қисмини ҳимоясиз қолдирди.
2026 йилда тахминан 21,9 миллион киши, яъни аҳолининг қарийб 45 фоизи гуманитар ёрдамга муҳтож бўлиши кутилмоқда. 2025 йил ноябридан 2026 йил мартигача ўткир озиқ-овқат танқислигига дуч келаётган аҳоли сони 14,8 миллиондан (аҳолининг 32 фоизи) 17,4 миллионга (36 фоиз) ошган.
2026 йил давомида 5 ёшгача бўлган тахминан 3,7 миллион бола ўткир тўйиб овқатланмасликдан азият чекиши кутилмоқда. Бундан ташқари, 1,2 миллион нафар ҳомиладор ва эмизикли аёллар ҳам хавф остида қолмоқда.
