Италияда ҳарбий самолётлар учун мўлжалланган қарийб 2 500 дона авионика ва эҳтиёт қисмларининг ғойиб бўлиши бўйича тергов бошланди. Бриндизи шаҳридаги ҳаво кучлари омборларидан йўқолган ускуналарнинг умумий қиймати 17 миллион еврога баҳоланмоқда. Бу ҳақда “Euronews” ёзди.
Йўқолган жиҳозлар орасида Panavia Tornado, AMX ва Lockheed C-130 Hercules самолётлари учун муҳим электрон тизимлар бор. Бу оддий эҳтиёт қисмлар эмас, балки хавфсиз парвозни таъминловчи стратегик авионика элементлари ҳисобланади.
Прокуратура тахминан ўн нафар шахсни, жумладан юқори лавозимли логистика раҳбарлари ва омбор хизматини юритган хусусий компания вакилларини “ўғриликда” гумон қилмоқда. Терговчилар қисмларни аввал расмий ҳисобдан чиқарилиб, “яроқсиз” деб қайд этиш орқали уларнинг изини йўқотишга уриниш бўлганми-йўқми, шуни ўрганмоқда.
Айрим нашрлар эҳтиёт қисмлар Жанубий Америкага, хусусан, Бразилияга йўналтирилган бўлиши мумкинлигини тахмин қилмоқда. Италия суд органлари техник экспертиза тайинлаб, ушбу жиҳозлар ҳақиқатан чиқиндими ёки фойдаланишга яроқлими аниқлашга киришган.
