Қашқадарё ва Тошкент вилоятларида ўтказилган тезкор тадбирлар давомида 201 кг каннабис ва 1 кг 994 гр “гашиш” мусодара қилинди. Бу ҳақда Давлат хавфсизлик хизмати хабар берди.
Қайд этилишича, Шаҳрисабз шаҳрида истиқомат қилувчи, 1985 йилда туғилган фуқаро ўзининг яшаш хонадони ҳовлисидаги 5,3 сотих ер майдонида иссиқхона ташкил қилган. Иссиқхона кўздан кечирилганда келгусида сотиш мақсадида 714 туп каннабис ўсимлигини экиб, парваришлаб келаётганлиги маълум бўлган. Экспертиза хулосасига кўра, ушбу ўсимликларнинг соф оғирлиги 201 килограммни ташкил этади.
Бундан ташқари, Тошкент вилоятининг Бекобод шаҳрида яшовчи, 1966 йилда туғилган, муқаддам судланган фуқаро пойтахтнинг Юнусобод тумани ҳудудида ҳаракатланаётган вақтида Давлат хавфсизлик хизмати ва божхона идоралари ходимлари томонидан тўхтатилиб, текширилган.
Унинг қўлидаги селлофан пакет ичида 1 кг 994 гр “гашиш” моддаси борлиги аниқланиб, ашёвий далил сифатида олинган. Мазкур шахс қўшни давлатдан контрабанда қилинган ушбу гиёҳвандлик моддасини Тошкент шаҳрида сотишни режалаштирган.
Билдирилишича, ҳозирда ҳар икки ҳолат бўйича наркосавдогарларга нисбатан жиноят ишлари қўзғатилиб, тергов ҳаракатлари олиб борилмоқда.
