Бирлашган Араб Амирликларида илк бор миллий поезд хизмати йўловчилар учун ўз эшикларини очди. Узоқ кутилган экспресс поездлар тармоғининг биринчи босқичи 30 июнь куни аҳоли учун фойдаланишга топширилди. Тармоқ келажакда минтақадаги 11 та шаҳарни бир-бири билан боғлайди.
Яқин Шарқдаги бу мамлакатда биринчи поезд маҳаллий вақт билан соат 05:34 да Уммон қўлтиғи бўйидаги Фужайра шаҳридан йўлга чиқди. Илк рейс қарийб 250 километр масофани 1 соату 45 минутда босиб отди. Поезд эрталаб соат 07:19 да пойтахт Абу Дабидаги Муҳаммад бин Зайд Cитй станциясига етиб келди.
Etihad Раил оператори берган пресс-релизга кўра, бу янги тармоқнинг биринчи иш кунида режалаштирилган олтита рейсдан биринчиси бўлди. Компания ҳозирча бошланғич-таништирув операцион босқичини бошлади.
Янги поезд йўналиши ишга тушишидан олдин 10 мингдан ортиқ чипта сотилиб кетди. Etihad Rail ўз мижозларига замонавий саёҳатни ваъда қилмоқда. Поездлар кондиционер, Wi-Fi тармоғи, розеткалар ва ўриндиқлар билан таъминланган. Шунингдек, янада қулай саёҳат қилишни хоҳловчилар учун премиум-класс хизматлари ҳам мавжуд.
“Бугун тонгда Фужайрадан биринчи поезднинг йўлга чиқиши миллий ғоямиз кундалик ҳаётимизнинг бир қисмига айланган лаҳзадир. Бу одамларга бир-бири билан, янги имкониятлар билан ва мамлакатимизни ноёб қиладиган жойлар билан боғланишнинг янги усулини беради”, деди Etihad Rail операцион директори Азза Алсувайди.
Келгуси режалар ва чипта нархлари
Поездлар тармоғи 2026 йил охирида янада кенгайтирилади. 30 сентябрь куни Дубай ва Ал Дайд станциялари очилади. Орадан уч ой ўтгач эса Ал Дафра ҳудудидаги станциялар ишга тушади. Компания маълумотларига кўра, 2027-йилнинг март ойи охирида Шаржа станцияси очилиши билан умумий йўналиш тўлиқ якунланади.
Чипта нархлари комфорт класс учун 55 дирҳамдан (15 доллар), премиум класс учун эса 120 дирҳамдан (33 доллар) бошланади. Ҳозирда компания паркида 13 та поезд мавжуд бўлиб, уларнинг ҳар бири 400 нафаргача йўловчини сиғдира олади. Узунлиги 900 километр бўлган бу тармоқ БААда углерод чиқиндиларини камайтириш ва экологик барқарор транспорт тизимини ривожлантириш бўйича кенг кўламли режанинг бир қисмидир.
Барча станциялар тўлиқ ишга тушгач, тармоқ Уммон қўлтиғини Форс кўрфази билан боғлайди. Йўналиш амирликларни кесиб ўтиб, Абу Дабининг ички ҳудудлари орқали Саудия Арабистони чегарасидаги Гувейфат шаҳригача боради.
