Буюк Британия жорий йил 8 апрелдан бошлаб мамлакатга кириш учун зарур бўлган аксарият визалар, жумладан, туристик визалар учун тўловларни оширади. Бу ҳақда Бирлашган Қироллик Ташқи ишлар вазирлиги сайтида хабар берилди.
Қайд этилишича, олти ойгача бўлган қисқа муддатли меҳмон визаси нархи 127 фунтдан 135 фунтга кўтарилади. Икки йилгача бўлган ташриф буюрувчи визаси 475 фунтдан 506 фунтга, беш йилгача бўлган виза эса 848 фунтдан 903 фунтгача қимматлашади. Ўн йилгача бўлган узоқ муддатли меҳмон визасининг нархи 1059 фунтдан 1128 фунтгача ошади. Ҳозирда 524 фунт бўлган талабалик визаси жорий йил 8 апрелдан 558 фунтгача кўтарилади.
6 ойдан 11 ойгача бўлган хусусий тиббий даволаниш визаси нархи 220 фунтдан 234 фунтга ошади. Ҳаво орқали транзит визаси 39 фунтдан 41,5 фунтга, қуруқлик орқали эса 70 фунтдан 74,5 фунтгача қимматлашади. Электрон кириш рухсатномаси (ETA) 4 фунтга қимматлашиб, 8 апрелдан бошлаб 20 фунтни ташкил этади.
Фуқаролик олиш учун тўловлар 1709 фунтгача, муддатсиз кириш рухсатномаси учун эса 3226 фунтгача ошади.
