Интернетда аёллар номидан бир нечта профиль очиб, фирибгарлик билан шуғулланиб келган шахс қўлга олинди. Бу ҳақда Тошкент вилояти ИИББ хабар берди.
Қайд этилишича, Тошкент вилоятининг Янгийўл туманида яшовчи, 2005 йилда туғилган фуқаро савдо платформасида сохта эълонлар жойлаштириб, Telegram-ижтимоий тармоғида аёллар исм-шарифлари остида 10 га яқин аккаунт яратган. У ўзини бошқа шахс сифатида таништириб, Iphone русумидаги телефонларни арзон сотиш баҳонасида фуқаролардан олдиндан пул олган ва маблағларни бошқа шахсларга тегишли банк карталарига ўтказдириб, шахсий эҳтиёжларига сарфлаб юборган.
Шунингдек, ўтказилган тадбир жараёнида жиноят қуроли сифатида фойдаланилган банк карталари ва телефон рақамлари ашёвий далил сифатида олинган. Дастлабки тергов давомида Тошкент вилоятининг Нурафшон, Оҳангарон, Ўрта Чирчиқ, Юқори Чирчиқ, Бўка, Қибрай ва Тошкент туманларида содир этилган 8 та шу каби жиноят айнан ушбу шахс томонидан содир этилгани фош бўлган.
Мазкур ҳолат юзасидан гумонланувчига нисбатан Ўзбекистон Республикаси Жиноят кодексининг 168-моддаси (фирибгарлик) 3-қисми “б, г” бандлари бўйича жиноят иши қўзғатилиб, тергов ҳаракатлари бошланган.
