АҚШ президенти Дональд Трамп Украинада давом этаётган урушни тўхтатиш масаласида Хитой президенти Си Цзиньпин билан ҳамкорлик қилишга умид қилаётганини маълум қилди.
Трамп бу ҳақда Осиёга сафари арафасида президент самолёти бортида журналистлар билан суҳбатда баён этди.Унинг айтишича, у Малайзия, Япония ва Жанубий Кореяга ташриф буюриб, Куала-Лумпурда бошланадиган Осиё мамлакатлари ассоциацияси (АСЕАН) саммитида иштирок этади.
«Биз Хитойнинг Россия масаласида ёрдам беришини истаймиз. Биз Россияга нисбатан жуда катта санкциялар жорий этдик. Ушбу санкциялар жиддий таъсир кўрсатишига ишонаман. Лекин биз Хитой ҳам ёрдам бериши тарафдоримиз», – деди АҚШ президенти журналистнинг шу ҳақдаги саволига жавобан.
Шу билан бирга, Трамп Россияга қўлланилган санкциялар Путин томонидан кескин қарши реакцияга сабаб бўлишидан хавотирда эмаслигини ҳам таъкидлади.
«Мен бундай деб ўйламайман. Путиннинг ўзи санкциялар катта таъсир қилмаслигини айтган. Лекин мен унинг бу фикрига қўшилмайман. Кўрамиз, натижа қандай бўлади. Ўйлайманки, у ҳам бу урушни тугатишни истайди», – деди Трамп.
