АҚШ президенти Дональд Трамп дунёдаги энг йирик Binance криптовалюта биржаси асосчиси Чанпен Чжаони афв этди. Бу ҳақда The Wall Street Journal хабар берди.
Маълумотларга кўра, бу қарор Чжаонинг “Трамп оиласига тегишли криптокомпанияни ривожлантиришга қаратилган бир неча ойлик саъй-ҳаракатларидан сўнг” қабул қилинган. Президентнинг афв ҳақидаги фармони 22 октябрь куни имзоланган. Оқ уй матбуот котиби Керолайн Левитт афв ҳақиқатдан ҳам амалга оширилганини тасдиқлади. Унинг сўзларига кўра, Трамп “ўзининг конституцион ваколатларидан фойдаланиб, Байден маъмурияти томонидан ‘криптовалютага қарши уруш’ доирасида таъқиб қилинган Чжаони афв этди”.
Трампнинг афви Binance’нинг АҚШ бозорига қайтишига йўл очиши мумкин
2023 йил ноябрь ойида компания АҚШдаги пул ювишга қарши қонунларни бузганини тан олди ва мамлакат ҳудудида фаолият юритиш ҳуқуқидан маҳрум бўлди. Ўша пайтда Чжао Binance бош директори лавозимини тарк этган, аммо компаниянинг асосий аксиядори сифатида қолган.
2024 йил баҳорида Чжао АҚШда тўрт ой қамоқ жазосига ҳукм қилинган, у ўша йилнинг сентябрида озодликка чиққан. Миллиардер айбини тан олган ва 50 миллион доллар жарима тўлаган. Чжао банк сири тўғрисидаги қонун талабига биноан пул ювишга қарши самарали дастурни атайлаб амалга оширмаганликда айбланган. Шунингдек, у Binance’га ноқонуний фаолиятдан олинган даромадларни, жумладан, америкаликлар ва санкциядаги шахслар ўртасидаги пул ўтказмаларини бошқаришга рухсат берганликда айбланган.
Прокурорларнинг таъкидлашича, Чжао АҚШ қонунларини “мисли кўрилмаган миқёсда” бузган ва Binance’нинг қонуний мажбуриятларини “атайлаб эътиборсиз қолдирган”.
2025 йил май ойининг охирида АҚШ Қимматли қоғозлар ва биржалар комиссияси (SEC) Binance’га қарши фуқаролик даъвосини ихтиёрий равишда қайтариб олди. Бу тўғрисидаги ариза Вашингтон федерал судига (Колумбия округи) топширилди. Reuters агентлиги хабар беришича, ҳужжатни SEC, Binance ва Binance асосчиси Чангпенг Чао адвокатлари имзолади.
