Индонезиянинг Аче провинциясидаги Каранг Бару шаҳрида кучли ёмғирлар ортидан юзага келган вайронкор тошқинлар оқибатида ҳудудларда ҳаракатланиш деярли имконсиз бўлиб қолди. Сув тошқинлари оқибатида 900 дан ортиқ киши ҳалок бўлган. Бу ҳақда “Reuters” хабар берди.
Расмий маълумотларга кўра, Суматра оролидаги учта провинцияда содир бўлган сув тошқинлари ва кўчкилар қурбонлари сони 908 кишига етган, яна 410 киши бедарак йўқолган. Бўрон тизимлари Таиланд ва Малайзия жанубида ҳам қарийб 200 кишининг умрига зомин бўлган.
Маҳаллий ҳокимият Жакарта ҳукуматини қўшимча маблағ ажратиш учун “Миллий фавқулодда ҳолат” эълон қилишга чақирмоқда. Бироқ Президент Прабово Субианто ҳафта бошида вазият яхшиланганини ва ҳозирги чоралар етарли эканини билдирган.
Экологик ташкилотлар вайронкор тошқинларга минтақадаги ўрмонларнинг катта миқёсда кесилиши, ноқонуний тоғ-конь ишлари ва инфратузилма қурилишлари ҳам сабаб бўлганини айтмоқда.
Индонезия Атроф-муҳитни муҳофаза қилиш вазирлиги тошқин зарарини кучайтирганликда гумон қилинган бир нечта компаниялар фаолиятини вақтинча тўхтатганини билдирди. Уларга экологик аудит ўтказиш мажбурияти юкланди.
Мамлакатнинг энг катта яшил ҳудудларини йўқ қилган компаниялардан бири деб North Sumatra Hydro Energy – Батанг Торудаги Хитой томонидан молиялаштирилган 510 МВт қувватли ГЭС корхонаси ҳамда Agincourt Resources – худди шу минтақадаги Martabe олтин кони гумонланмоқда.
Ҳаводан ўтказилган текширувларда Батанг Торуда катта ҳудудларда дарахтлар кесилгани, бу эса сув оқимини кескин тезлаштириб, тошқин кучини оширгани аниқланган.
