Бугун, 15 январь куни Эрон ҳукумати мамлакат ҳаво ҳудудини қайта очди. Бу ҳақда “Al Jazeera” хабар берди.
Маълумотларга кўра, парвозни биринчилардан бўлиб қайта тиклаган авиакомпаниялар қаторида Эроннинг Mahan AIR, Yazd Airways ва AVA Airlines компаниялари бор. Таъқиқ тахминан 5-8 соат давом этган.
Теҳрон томонидан эълон қилинган расмий хабарга кўра, чекловлар Тошкент вақти билан 15 январь куни 00:45 да кучга кирган. “Flightradar24”нинг қайд этишича, хабар эълон қилинган вақтда Эрон ҳаво ҳудудида атиги иккита самолёт бўлган, булар – Бангкок ва Истанбулдан Теҳронга учаётган рейслар.
14 январь куни “Reuters” агентлиги европалик расмийга таяниб, АҚШ яқин 24 соат ичида Эронга зарба бериши мумкинлиги ҳақида хабар тарқатган эди. АҚШ Президенти Дональд Трамп агар Эронда декабрь охиридан бери давом этаётган оммавий норозилик намойишларини бостиришда куч ишлатиш давом этса, Вашингтон аралашувини истисно қилмаслигини айтган.
28 декабрь куни Теҳронда Эрон риали курсининг кескин тушиб кетиши сабабли савдогарлар норозилик акцияларини бошлаган эди. 30 декабрь куни намойишларга талабалар қўшилди. Тартибсизликлар аксарият йирик шаҳарларга тарқалди. 2 январь куни кўчаларда қуролланган номаълум гуруҳлар пайдо бўлиб, исёнчилар ва ҳуқуқ-тартибот органлари ўртасида қуролли тўқнашувлар сони кўпайди.
Тартибсизликларнинг энг кескин палласи 8 январь оқшомига тўғри келди. Ўшанда талончилар ҳаракатлари оқибатида камида 12 нафар тинч аҳоли вакили, жумладан бир бола ҳалок бўлган. Расмийлар 25 нафар ҳуқуқ-тартибот ходими ҳам ҳалок бўлганини маълум қилди. Теҳрон мери Алиреза Заканийнинг билдиришича, исёнчилар пойтахтда 25 та масжидни ёқиб юборган, 26 та банк, 3 та тиббиёт маркази, 10 та давлат муассасаси, 48 та ёнғин ўчириш машинаси, 42 та автобус ва тез ёрдам автомобили ҳамда 24 та турар жойга зарар етказган.
Эрон ҳукумати тартибсизлик иштирокчиларини террорчилар деб атаб, воқеаларни ташкил этишда Исроил ва АҚШни айблаган.
