Россия Қуролли кучлари сафида хизмат қилиш учун алдов йўли билан шартномага қўл қўйдирилган Ўзбекистон фуқаросига ёрдам берилди.
Ўзбекистоннинг Санкт-Петербург шаҳридаги Бош консулхонасининг хабар қилишича, фуқаро К.М. мурожаат қилиб, фарзанди К.Р. Россияда бошқа бир Ўзбекистон фуқаросига қасддан енгил тан жароҳати етказиш айби билан Ленинград вилояти Колпино шаҳридаги Тергов ҳибсхонасига олиб келинганини, у ерда ўғлига алдов йўли билан Россия Қуролли кучлари сафида хизмат қилиш юзасидан шартномага имзо қўйдириб олишганини билдирган.
Фарзандида руҳий соғлиғи билан боғлиқ оғир бузилишлар борлигини инобатга олиб, ушбу шартномани бекор қилишда кўмак сўраб мурожаат қилган. Бош консулхона К.Р.нинг ҳуқуқ ва эркинликларини ҳимоя қилиш мақсадида Россиянинг мутасадди идораларига, жумладан Ленинград вилоятидаги Инсон ҳуқуқлари бўйича вакилига, тегишли тартибда сўровномалар юборган.
Натижада, К.Р.нинг Россия Қуролли кучларида хизмат қилишга қаршилиги инобатга олиниб, у билан ҳарбий шартнома тузилмаган ҳамда у тергов ҳаракатларини давом эттириш учун Колпино шаҳридаги Тергов ҳибсхонасига қайтарилган.
“Ҳозирда мавжуд жиноят иши доирасида олиб борилаётган тергов жараёнларида К.Р.нинг ҳуқуқ ва қонуний манфаатларини ҳимоя қилиш Бош консулхона назоратига олинган”, дейилади хабарда.
2025-йилнинг августида Қирғизистон фуқароси билан шунга ўхшаш ҳолат юз берган. Россияда алданиб, Украинадаги урушга кетиши мумкин бўлган фуқароси қутқарилган. Унга юқори маошли иш ваъда қилинган, аммо бунинг ўрнига Россия Мудофаа вазирлиги билан уруш шартномасини таклиф қилишган. Гап нимадалигини тушунган заҳоти Қирғизистон элчихонасига ёрдам сўраб мурожаат қилган. Элчихона ходимлари етиб келгач, эркак ҳарбий хизматдан ёзма равишда воз кечган ва унга жавоб берилган.
2025 йил октябрь ойи ўрталарида Россия томонидан урушга жалб қилинган Ўзбекистон фуқароси — бухоролик 31 ёшли йигит Украина фронтига етиб борган заҳоти таслим бўлганди. У Россия армияси сафида урушга қатнашиш шартномасини мажбурий равишда имзолаганини айтган. Полиция уни гиёҳванд моддалар билан алоқадорликда айблаб, 12–18 йилга қамаш билан таҳдид қилган. Унинг олдига иккита танлов қўйилган: қамоқ ёки фронт.
