Россияда 4 ой давомида маошсиз ва озиқ-овқат таъминотисиз қолдирилган 100 нафардан ортиқ ўзбекистонлик ишчига ёрдам берилди. Бу ҳақда Миграция агентлиги хабар қилди.
Қайд этилишича, иш берувчиларнинг ойликдан қарздорлиги қарийб 24 миллион рублга етган (тахминан 320 минг доллар). Айрим ишчилар нолегал ҳолатга тушиб қолган. Шундан сўнг улар Миграция агентлигига мурожаат қилиб, ёрдам сўраган.
Миграция агентлигининг Россиядаги ваколатхонаси томонидан адвокатлар жалб этилиб, Бош консулхона томонидан ҳолат юзасидан тегишли органларга нота юборилган, дипломатик каналлар ишга туширилган. Ваколатли органлар томонидан иш берувчиларга нисбатан Россия Жиноят кодексининг 145.1-моддасига (иш ҳақи, пенсия, стипендия ва бошқа тўловларни тўламаслик) асосан жиноят иши қўзғатилган.
Бунинг натижасида озиқ-овқат таъминоти қайта тикланишига эришилган. 105 нафар фуқарога 9 403 000 рубль (тахминан 125 минг доллар) иш ҳақлари ундириб берилган. Қарздорликнинг қолган қисми 15 майга қадар тўланиши кутилмоқда.
Ноқонуний ҳолатга тушганлар Миграция агентлиги томонидан ватанга қайтарилди ва моддий ёрдам ажратилди.
Агентлик хабарига кўра, бунда Ўзбекистоннинг Россиядаги дипломатик ваколатхоналари ва Россиянинг ҳуқуқни муҳофаза қилувчи органлари билан яқин ҳамкорликда иш олиб борилди.
