Самарқанд вилоятида ёлланма қотиллик жиноятини содир этишнинг олди олинди. Ҳуқуқни муҳофаза қилувчи органлар томонидан ўтказилган тезкор тадбирлар давомида танишини ўлдиришни режалаштирган шахслар қўлга олинди, деб хабар берди вилоят ИИБ ахборот хизмати.
Маълум қилинишича, тадбир Самарқанд вилояти Ички ишлар бошқармаси, Давлат хавфсизлик хизмати Самарқанд вилояти бошқармаси ҳамда Самарқанд вилояти прокуратураси ходимлари ҳамкорлигида ўтказилган. Олинган тезкор маълумотларга кўра, 2002 йилда туғилган шахс Тошкент шаҳрида яшовчи таниши билан ўртасида келиб чиққан низо сабаб уни ўлдиришни режалаштириб, ёлланма қотил излаётгани аниқланган.
Шундан сўнг тезкор тадбирга киришилиб, ҳуқуқ-тартибот идоралари томонидан шартли ёлланма қотил жалб этилган. Гумонланувчи ушбу шахсга ўзи билан келишмовчилиги бўлган одамни ўлдириш эвазига 2200 доллар беришни ваъда қилган.
27 январь куни Самарқанд шаҳрида ўтказилган тезкор тадбир давомида гумонланувчи шартли ёлланма қотилдан гриммланган мурда фотосуратини қабул қилиб олгач, 2000 доллар миқдоридаги пул маблағларини топшираётган вақтида ашёвий далиллар билан ушланган.
Кейинги текширувлар давомида гумонланувчига қотил ёллаш топшириғини ўзи ишлаётган МЧЖ раҳбари — 1996 йилда туғилган шахс бергани аниқланган. У Тошкент шаҳрида яшовчи қариндошини ўлдириш мақсадида буюртма берган. Улар ўртасида аввалдан келиб чиққан низолар ва катта миқдордаги қарз мавжуд бўлган. Мазкур шахс ҳам қўлга олинди.
Ҳозирда ҳолат юзасидан Жиноят кодексининг 25-моддаси орқали 97-моддаси иккинчи қисми билан жиноят иши қўзғатилган. Тергов ҳаракатлари давом этмоқда. Амалдаги қонунчиликка кўра, қасддан одам ўлдириш жиноятини содир этган шахс умрбод озодликдан маҳрум этишгача бўлган жазога тортилиши мумкин.
