Навоийда ўзини ички ишлар ходими деб таништириб, қонунга зид хатти-ҳаракатлари ортидан мўмай даромад топган шахс ушланди. Бу ҳақда Навоий вилояти ИИБ ахборот хизмати раҳбари
Фаёз Қосимов маълум қилмоқда.
Таъкидланишича, Сурхондарё вилоятида яшаб келган 25 ёшли фуқаро Р.Ж. навоийлик аёл Ф.Т. билан ижтимоий тармоқ орқали танишиб, у билан ишқий муносабат ўрнатган. Р.Ж. қисқа вақтда аёлнинг ишончига кириб, ярим яланғоч кўринишдаги расм ва видеоларига «эга» бўлган.
Орадан вақт ўтиб, ўрталарида ўзаро келишмовчилик бошлангач, ўзини олдиндан ИИБ ходими, деб таништирган Р.Ж. аёлнинг шахсий сурат ва видеоларини ижтимоий тармоқларда тарқатиш билан қўрқитган. Ундан пул талаб қилиб келган.
«Аввалига қариндошларимдан икки юз эллик минг сўмдан бир ярим миллион сўмгача қарз олиб, унинг талабларини қоплай бошладим. Аммо, Р.Ж. кунора пул сўраб, яна «шантаж» қилаверди. Охири ички ишлар органларига мурожаат қилишга мажбур бўлдим», — деган Ф.Т. тергов жараёнларида.
Ички ишлар вазирлиги шахсий хавфсизлик бош бошқармаси Навоий вилояти бўйича бўлими ҳамда вилоят ИИБ тезкор қидирув хизмати жиноят қидирув бошқармаси ходимлари томонидан ушбу ҳолат юзасидан тезкор тадбир ташкил этилиб, товламачиликда гумон қилинган шахс қўлга олинган.
«Мен бу хатти-ҳаракатларимни ҳеч ким билмайди ва мени ҳеч ким тополмайди, деб ўйлагандим. Қилган ишимдан пушаймонман», — дея айбига иқрор бўлган Р.Ж.
Айни пайтда айбдорнинг қилмишига нисбатан Жиноят кодексининг 165-моддаси асосида тергов ҳаракатлари олиб борилмоқда.
