АҚШ президенти Дональд Трамп мамлакатнинг Солиқ хизмати ва Молия вазирлигига қарши 10 миллиард доллар миқдорида даъво аризаси киритди. Бу ҳақда Associated Press хабар берди.
У федерал идораларни 2018—2020 йиллар оралиғида президентнинг солиқ маълумотлари оммавий ахборот воситаларига чиқиб кетишининг олдини олмаганликда айбламоқда. Флорида федерал судига берилган даъвога президентнинг ўғиллари Эрик Трамп ва кичик Дональд Трамп ҳамда Трамп ташкилоти даъвогар сифатида киритилган.
Суд ҳужжатларида таъкидланишича, Трамп ва Trump Organization’га тегишли махфий солиқ ҳужжатларининг ошкор бўлиши уларнинг “обрўси ва молиявий ҳолатига зарар етказган, жамоатчилик олдида ноқулай вазиятга туширган, Трамп ҳамда бошқа даъвогарларнинг жамоатчиликдаги мавқеига салбий таъсир кўрсатган”.
2024 йилда илгари Солиқ хизмати билан шартнома асосида ишлаган Чарльз Эдвард солиқ маълумотларини ОАВга сиздирганини тан олгач, беш йилга озодликдан маҳрум этилганди. У мудофаа ва миллий хавфсизлик соҳасида фаолият юритувчи Booz Allen Hamilton компаниясида ишлаган.
Эдвард 2018–2020 йиллар давомида The New York Times ва ProPublica нашрларига Трамп ва бошқа шахсларга оид солиқ маълумотларини тақдим этган. Прокурорлар бу сизиб чиқишни “Солиқ хизмати тарихидаги мисли кўрилмаган ҳолат” деб баҳолаган. Маълумотларнинг ошкор этилиши АҚШ Солиқ кодексининг 6103-моддасини бузган. Ушбу норма федерал қонунчиликдаги энг қатъий махфийлик талабларидан бири ҳисобланади.
The New York Times Дональд Трамп 2020 йилгача узоқ йиллар давомида федерал даромад солиғи тўламаганини хабар қилган. ProPublica эса 2021 йилда Трампнинг солиқ ҳужжатларидаги тафовутларга бағишланган бир қатор материалларни эълон қилган. Кейинчалик Трампнинг олти йиллик солиқ декларациялари ўша пайтда демократлар назоратида бўлган АҚШ Вакиллар палатасининг Солиқ ва маблағлар қўмитаси томонидан ошкор қилинган.
Трампнинг даъво аризасида айтилишича, Эдварднинг ОАВга ошкор қилган маълумотлари “Даъвогарларга обрў ва молиявий зарар етказган ва 2020 йилги президентлик сайловларида президент Трампнинг сайловчилар томонидан қўллаб-қувватланишига салбий таъсир кўрсатган”.
Шунингдек, Эдвард миллиардер Жефф Безос ва Илон Маск каби бошқа миллиардерларнинг ҳам солиқ ҳужжатларини ўғирлагани қайд этилган. Трампнинг даъвоси АҚШ Молия вазирлиги бу ҳафта бошида Booz Allen Hamilton компанияси билан тузилган шартномаларни бекор қилганидан сўнг киритилди. Эдвард ушбу компанияда ишлаган ва мамлакатдаги энг бой минглаб одамлар, жумладан, президентга оид солиқ маълумотларини ОАВга сиздиргани учун айбланиб, кейинчалик қамоққа ҳукм қилинган.
