УЕФА Исроилнинг “Маккаби Тель-Авив” клубини мухлислар томонидан йўл қўйилган ирқчилик ва камситувчи ҳаракатлар сабаб жазолади. Бу ҳақда BBC нашри хабар берди.
Унга кўра, воқеа Европа Лигаси доирасидаги “Штутгарт” ҳамда “Маккаби Тель-Авив” жамоалари ўртасидаги беллашув вақтида содир бўлган. Учрашув 11 декабрь куни бўлиб ўтган ва унда немис клуби 4:1 ҳисобида ғалаба қозонган. Ўйиндан кейин айрим исроиллик мухлислари томонидан ҳақоратомуз ва миллатлараро низоларни келтириб чиқарувчи шиорлар айтилгани қайд этилган.
Маҳаллий ОАВ хабарига кўра, бир қанча мухлислар фаластинликлар ва араб миллатига қарши ҳақоратли иборалар ишлатган. Шунингдек, баъзи мухлислар Германия ҳамда Европанинг кўплаб давлатларида тақиқланган нацистик ишоралар қилгани ҳам айтилган. Қолаверса, Германия полицияси ўйин пайтида пиротехника ишлатган олти нафар исроиллик мухлисни қўлга олган.
УЕФА мазкур хатти-ҳаракатларни интизомий регламентнинг 16-моддасига мувофиқ “ирқчилик ва камситиш” сифатида баҳолади ва клубни 20 минг евро жаримага тортди. Шунингдек, ташкилот “Маккаби Тель-Авив”нинг навбатдаги сафар ўйинида исроиллик мухлисларга чипта сотилмаслиги бўйича қарор қабул қилди. Ҳозирча Исроил клуби мазкур ҳолат юзасидан расмий муносабат билдирмади.
Маълумот учун, “Маккаби Тель-Авив” клуби Европа Лигаси гуруҳ босқичи 6-туридан кейин 1 очко тўплаган ҳолда охирги ўринлардан бирини эгаллаб турибди.
