YouTube 24 августдан бошлаб видеоларни кўришни улар ишга тушиши билан, биринчи кадрданоқ ҳисоблай бошлайди. Янги тизим бутун дунё бўйлаб барча форматдаги видеолар учун амал қилади. Бу ҳақда платформанинг маълумотномасида маълум қилинди.
Аввалроқ платформа форматига қараб, кўришларни ҳисоблашнинг турли усулларидан фойдаланар эди. Энди YouTube бу кўрсаткични бирхиллаштиришга қарор қилди. Компания бу ўзгаришни кўрсаткични ягона стандартга келтириш ва муаллифларга “ўз видеолари қамрови ҳақида тўлиқроқ тасаввур бериш” истаги билан изоҳлади.
“24 августдан бошлаб YouTube’да кўришлар сони акс этадиган барча жойларда янги кўрсаткични кўра бошлайсиз (бу эса келажакда муаллифларнинг умумий кўришлар сони, эҳтимол, тезроқ ўсишини англатади)”, дейилади хабарда.
Платформанинг таъкидлашича, янги тизим монетизацияга таъсир қилмайди: тўловлар аввалгидек жалб қилинган кўришлар ва кўриш соатлари асосида ҳисобланади.
Роликни ишга тушгандан кейин кўришда давом этган фойдаланувчилар сони YouTube Analytics’да сақланиб қолади.
The Verge нашрининг ёзишича, кўришларни ҳисоблашнинг худди шундай алгоритми TikTok ва Instagram’да ҳам мавжуд. X ижтимоий тармоғида эса фойдаланувчи видеони камида икки сония томоша қилсагина, кўриш ҳисобга олинади. Нашр маълумотларига кўра, ўтган йили YouTube бу усулни YouTube Shorts учун қўллаган эди.
