АҚШ расмийлари Сурия ҳудудидаги қарийб 1 000 нафарга яқин ҳарбий хизматчининг барчасини олиб чиқиб кетиш жараёни бошланганини маълум қилди. Шу билан ИШИДга қарши курашган Америка ҳарбий иштирокига нуқта қўйилмоқда. Бу ҳақда америкалик манбаларга таяниб, The Wall Street Journal хабар берди.
Стратегик базалар бўшатилди
Маълум қилинишича, қўшинларни олиб чиқиш жараёни Суриянинг шимоли-шарқий қисмидаги стратегик постларни ҳамда Сурия, Жордания ва Ироқ чегарасидаги ҳудудларни аллақачон қамраб олган.
Хусусан, ўтган ҳафтада АҚШ ҳарбийлари ат-Танф базасидан чиқиб кетганини тасдиқлаган. Сурия жанубида, Ироқ ва Иордания чегаралари яқинида жойлашган ушбу база 2017 йилда жиддий мағлубиятга учрагунга қадар Ироқ ва Суриянинг катта қисмини назорат қилган ИШИДга қарши халқаро коалиция операцияларининг асосий маркази бўлиб хизмат қилган эди.
АҚШ Марказий қўмондонлиги (CENTCOM) ўтган ҳафтадаги ушбу “тартибли чиқиш”ни шароитдан келиб чиққан режали ўтиш жараёнининг бир қисми деб атаган. The Wall Street Journal нашрининг ёзишича, қўшинларнинг тўлиқ олиб чиқиб кетилиши келгуси икки ой давомида якунланади. Дональд Трамп маъмурияти ушбу қарорни камида январь ойидан бери муҳокама қилиб келаётган эди.
Эрон билан кескинлик ва денгиз кучлари
Нашрнинг таъкидлашича, Суриядан қўшинларни олиб чиқиш қарори Яқин Шарқнинг бошқа нуқталарида, хусусан, Эрон билан кескинлик фонида АҚШ денгиз ва ҳаво кучларининг кучайтирилиши билан боғлиқ эмас.
Сўнгги ҳафталарда Трамп маъмурияти Эрондаги намойишларнинг бостирилиши ва ядровий музокаралардаги қийинчиликлар сабабли Теҳронга қарши ҳарбий куч ишлатиш билан таҳдид қилган эди. Ушбу таҳдидлар доирасида минтақага иккинчи авиаташувчи — USS Gerald R.Ford кемаси йўналтирилган.
АҚШ воситачилигидаги янги келишув
Суриядан чиқиб кетиш ҳақидаги қарор мамлакат хавфсизлик тизимини қайта шакллантириш ва давлат ҳокимиятини мустаҳкамлашга қаратилган келишувдан сўнг қабул қилинди. АҚШ расмийлари ушбу битимни миллий бирлик ва ярашув сари ташланган муҳим қадам деб баҳоламоқда.
Келишувнинг асосий бандларига кўра, Вашингтоннинг ИШИДга қарши курашдаги асосий ҳамкори бўлган курдлар етакчилигидаги Сурия демократик кучлари (СДК) Сурия армияси таркибига интеграция қилинади.
Бу келишув муваққат президент Аҳмад аш-Шараъа бошчилигидаги ҳукумат кучлари СДК назоратидаги шимоли-шарқий ҳудудларни қайтариб олиш учун ҳаракат бошлаганидан сўнг амалга ошди.
Аввалроқ ҳукумат қўшинлари ва СДК ўртасида қонли тўқнашувлар юз берган эди, бу эса кенг кўламли уруш хавфини туғдирганди. 2026 йил 29 январда АҚШ кўмагида эришилган битим “мўрт” сулҳ ўрнатди ва икки ҳарбий кучнинг бирлашиши бўйича музокараларга йўл очди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
