Россия ва Озарбайжон Ташқи ишлар вазирликлари Ақтау яқинида содир бўлган AZAL самолёти ҳалокати туфайли вужудга келган низо ҳал этилганини маълум қилди. Томонлар ҳалокат сабаби сифатида Россия ҳаво ҳужумидан мудофаа тизими ишга тушганини тан олган ҳолда, жабрланганлар ва ҳалок бўлганларнинг оилаларига товон пули тўлашга келишиб олди.
Бу келишувлар Владимир Путин ва Илҳом Алиев ўртасида 2025 йил 9 октябрь куни Душанбеда бўлиб ўтган учрашувда эришилган келишувларга асосланган. Бироқ товон пуллари миқдори ва шартлари очиқланмаган.
Ҳалокат 2024 йилнинг 25 декабрида Ақтау яқинида содир бўлган. Боку–Грозний йўналишида учган Embraer 190 самолёти қулаган, унинг бортидаги 67 кишидан 38 нафари ҳалок бўлган. Аввалига Россия ушбу ҳодисага ўз мудофаа тизими алоқадорлигини инкор этган. расмийлар эса, сабаб сифатида қушлар билан тўқнашувни кўрсатган. Кейинчалик самолёт қолдиқларидан зенит ракета излари топилган.
2024 йилнинг 28 декабрида Владимир Путин Илҳом Алиевга қўнғироқ қилиб, воқеа “Россия ҳаво ҳудудида” содир бўлгани учун узр сўраган. Кейинчалик Алиев Москва томонини ҳақиқатни яширишда айблаб, айбдорларни жазолаш ва тўлиқ товон тўлашни талаб қилган.
Душанбедаги учрашувда Путин ҳалокатга “Украина дрони парвози” ва Россия тизимидаги техник носозлик сабаб бўлганини айтган. Унинг сўзларига кўра, икки ракета самолётга тўғридан-тўғри тегмасдан, унинг яқинида портлаган.
Шунга қарамай, тергов тўлиқ якунига етказилмаган: 2025 йил декабрь ойида Россия Тергов қўмитаси жиноий ишни айбдорларни жавобгарликка тортмасдан ёпган.
Янги қўшма баёнотда эса, икки давлат ўртасидаги келишувлар “ўзаро манфаатли ҳамкорликни янада ривожлантиришга интилишни тасдиқлаши” таъкидланган.
