Россиянинг Екатеринбург шаҳри яқинидаги ўрмондан Қирғизистон фуқароси бўлган 41 ёшли аёлнинг боши топилди. Бу ҳақда URA.RU хабар берди.
Маълумотларга кўра, жорий йилнинг 30 октябрь куни эрталаб Екатеринбургнинг жануби-ғарбий ўрмонида югуришга чиққан маҳаллий аҳолидан бири 41 ёшли аёлнинг бошсиз жасадини топиб олган. Шундан сўнг, ҳодиса ҳақида ҳуқуқ-тартибот идораларига хабар берилган.
Терговчилар аёлнинг шахсини аниқлаб, гумонланувчини қўлга олган. Қайд этилишича, қотил аёлнинг 21 ёшли ўғли бўлиб чиққан. У қотилликка иқрор бўлган.
Тергов маълумотларига кўра, она ва ўғил Қирғизистондан Екатеринбургга 2023 йилда борган. Аёл савдо марказида ишлаган, йигит ишсиз бўлган.
Жиноятчи қотилликни жорий йилнинг 20 октябрь куни ўрмондаги ёнилғи қуйиш шохобчаси ёнида содир этган. Она ва бола аввалдан жанжаллашиб келган. Қотиллик содир этилган кунда ҳам ўғил онаси билан жанжаллашиб қолган.
“Тергов давомида йигитдан қандай қилиб ўз онасини ўлдиргани ҳақида сўралганида, йигит кўп маротаба чорва молларини сўйганини ва бу жараёнга ўрганиб қолганини айтган”, дея қўшимча қилинади хабарда.
Ушбу жиноят юзасидан Россия Тергов қўмитасининг Свердловский вилояти бўлими томонидан Россия Жиноят кодексининг тегишли моддалари бўйича жиноят иши қўзғатилиб, тергов ҳаракатлари бошланган.
