Давлат хавфсизлик хизмати, Ички ишлар вазирлиги ва Божхона қўмитаси ҳамкорлигида ўтказилган тезкор тадбирлар давомида 6 мингдан ортиқ кучли таъсир қилувчи дори воситалари ноқонуний муомаладан чиқарилди. Бу ҳақда ДХХ ахборот хизмати хабар берди.
Маълум қилинишича, Фарғона шаҳрида яшовчи 1974 йилда туғилган фуқаро ўз хонадонида сотиш мақсадида сақлаб келган 3 минг 580 дона “Регапен” номли кучли таъсир қилувчи дори воситаси аниқланиб, ашёвий далил сифатида мусодара қилинган.
Яна бир ҳолатда Қўқон—Тошкент йўналишида ҳаракатланаётган автомобил тўхтатилиб текширилган. Қўқон шаҳрида яшовчи 1990 йилда туғилган шахс бошқарувидаги Lacetti’нинг салон қисмига яширилган 2 минг 520 дона “Регапен” дори воситаси топилган.
Шу тариқа, икки ҳолат бўйича жами 6 минг 100 дона кучли таъсир қилувчи дори воситаси ноқонуний муомаладан чиқарилган. Ҳозирда ҳар икки ҳолат юзасидан жиноят ишлари қўзғатилиб, тергов ҳаракатлари олиб борилмоқда.
ДХХ маълумотига кўра, сўнгги йилларда анъанавий гиёҳванд моддаларга нисбатан арзонроқ бўлган синтетик наркотиклар ва кучли таъсир қилувчи дори воситаларининг ноқонуний айланмаси кўпайиб бормоқда. Бундай препаратлар асосан қўшни давлатлардан ноқонуний йўллар билан олиб кирилиб, яширин равишда сотилмоқда.
