Фарғона вилояти Бешариқ тумани Булоқбоши маҳалласида яшовчи, 2005 йилда туғилган муқаддам судланган шахс товламачилик қилаётганда қўлга олинди. Бу ҳақда Ички ишлар вазирлиги хабар берди.
Маълум қилинишича, гумонланувчи 2026 йил апрель ойида сим карта сотиб олиб, Telegram ижтимоий тармоғида саҳифа очган. Ушбу сим карта эса, аввал бошқа фуқаро номида бўлганлиги сабабли, унда эски саҳифа сақланиб қолган. сим картанинг янги эгаси сақланиб қолинган шахсий ва оилавий суратлардан порнографик ҳолатдаги расмларни сунъий равишда қайта ишлаб, жабрланувчининг қариндошларига жўнатган. Ҳамда уларни ушбу расмларни бошқа Telegram каналларида ҳам тарқатиш билан қўрқитиб, тарқатмаслик эвазига пул талаб қилган.
Айтилишича, ушбу шахс жабрланувчидан турли банк карталари орқали жами 800 минг сўмдан ортиқ маблағни товламачилик йўли билан қўлга киритган. Олиб борилган тезкор қидирув тадбирлари давомида гумонланувчи Андижон шаҳар ҳудудида ушланган.
“Ушбу сунъий расмларни ўзим тайёрладим. Беҳаё расмларни тарқатиб юбораман деб қўрқитдим. Бу ишни қилишни истаганлар ушбу йўлдан қайтишсин. Охири яхшилик билан тугамайди. Минг алдаб-алдаб қочиб юраман деса ҳам барибир ушлаб топиб келишади”, деган гумонланувчи.
Ҳозирда мазкур ҳолат юзасидан Наманган шаҳар Ички ишлар бошқармаси ҳузуридаги тергов бўлинмаси томонидан Жиноят кодексининг 165-моддаси (товламачилик) иккинчи қисми “а” банди билан жиноят иши қўзғатилиб, қамоққа олиш тарзидаги эҳтиёт чораси қўлланилган. Ҳозирда дастлабки тергов ҳаракатлари олиб борилмоқда.
