Фарғона вилоятида ҳам иш вақтида маҳалла биносида қимор ўйнаётган пайтда ушланган таълим ходимлари жаримага тортилди.
2026 йил 7 февраль куни соат 11:00 ларда Фарғона туманидаги маҳаллалардан бирининг биносида етти нафар шахс пул тикиб, қимор ўйнаётган вақтида ички ишлар органлари ходимлари томонидан ушланган. Судланувчилардан ўйин картаси ва 2 миллион 653 минг сўм миқдордаги пуллари ашёвий далил сифатида олинган.
Текширув жараёнида қимор ўйинида иштирок этганларнинг ушбу ҳудуддаги мактабда турли лавозимларда фаолият юритиши аниқланган. Жумладан, мактаб директорининг маънавий-маърифий ишлар бўйича икки ўринбосари, информатика ва жисмоний тарбия ўқитувчилари, боғбон, дурадгор ва мактаб қоровули бўлган.
Жиноят ишлари бўйича Фарғона туман суди уларни Маъмурий жавобгарлик тўғрисидаги кодекснинг 191-моддаси 1-қисми билан айбдор деб топган. Уларнинг ҳар бирига базавий ҳисоблаш миқдорининг 5 баравари, яъни 2 миллион 60 минг сўм миқдорида жарима жазоси тайинланган. Ашёвий далил тариқасида олинган пуллар эса давлат фойдасига мусодара қилинган.
