Фарғона шаҳридаги кўп қаватли уйлардан бирининг ертўласида сунъий ҳовуз ўрнатилиб, унда акула боқилаётгани аниқланди. Бу ҳақда Фарғона вилояти ҳудудий Қурилиш ва уй-жой коммунал хўжалиги соҳасида назорат қилиш инспекцияси хабар берди.
Инспекция Фарғона шаҳрининг “Мурувват” маҳалласидаги кўп қаватли уйларда мониторинг ўтказган. Ўрганишлар давомида 78-уйнинг 17-хонадон мулкдори кўп квартирали уй ертўласида сунъий ҳовуз ўрнатиб, унда акула боқаётгани аниқланган.
Шунингдек, ертўлага катта ҳажмдаги бассейн ва сув қувури ўрнатилиб, балиқ боқилаётгани, ертўланинг турли қисмлари тўсилиб, умумий фойдаланишдаги майдон ўзбошимчалик билан эгаллаб олингани маълум бўлган.
Ҳолат юзасидан мулкдорга нисбатан маъмурий баённома расмийлаштирилиб, жарима қўлланилган. Ертўлани 15 кун ичида бўшатиб, аввалги ҳолатига келтириш бўйича ёзма кўрсатма берилган. Бундан ташқари, хонадонда ичимлик сувидан ўзбошимчалик билан фойдаланилгани ҳам аниқланган.
Мазкур ҳолат бўйича фуқарога нисбатан Маъмурий жавобгарлик тўғрисидаги кодекснинг 163-моддаси (водопроводдан фойдаланиш қоидаларини бузиш) 1-қисми асосида маъмурий жарима расмийлаштирилган.
Маълумот учун, кўп квартирали уйларнинг умумий фойдаланишдаги ҳудудлари, жумладан, ертўлаларидан қонунчиликда белгиланган талабларга зид равишда фойдаланиш тақиқланади.
