Фарғонада пора олганликда айбланган божхона инспектори 15 йилдан сўнг оқланди. Бу ҳақда Олий суд матбуот котиби Азиз Обидов маълум қилди.
Қайд этилишича,“Фарғона” божхона постида ишлаган ходим ҳамкасблари билан 2009 йил апрель ойидан 2010-йилнинг январь ойига қадар автомашиналарда картошка ҳамда олма маҳсулотларини Қирғизистондан Ўзбекистонга ноқонуний равишда, божхона назоратисиз ўтказиб бериш эвазига пора олганликда айбланган.
Унга яна бир неча ҳолат бўйича маҳсулотларни мамлакатга назоратсиз олиб кириш ёки чиқариш учун пул олганлик айблови ҳам эълон қилинган.
Инспектор Фарғона вилояти судининг 2010 йил 5 ноябрдаги ҳукми билан Жиноят кодексининг тегишли моддасида айбли деб топилиб, 3 йил муддатга божхона органларида ишлаш ҳуқуқидан маҳрум қилинган ҳолда, 4 йил муддатга озодликдан маҳрум қилиш жазосига маҳкум этилган.
Ходим Фарғона вилояти судига кассация шикояти билан мурожаат қилиб, ўзининг айбсизлигини исботловчи бир қатор далилларни тақдим этди.
Тергов давомида тазйиқ ва қийноқлар туфайли менга қўйилган айбловларни бўйнимга олишга мажбур бўлганман. Бироқ ҳеч кимдан пора олмаганман, деган инспектор судда.
Маълум бўлишича, фуқаро “Фарғона” божхона постида 2009 йил 1 июндан бошлаб хизмат қилган. Яъни 2009 йил апрель—май ойларида у ушбу постда ишламаган. Бу айбловнинг ноқонуний эканлигини кўрсатади.
Фарғона вилояти суди 2010 йил 5 ноябрдаги ҳукмини бекор қилиб, инспекторни айбсиз деб топди.
