Кеча, 6 апрель куни Тошкент шаҳрида иккита йўловчи ташувчи автобусда ёнғин содир бўлди. Бу ҳақда “Тошшаҳартрансхизмат” акциядорлик жамияти хабар берди.
Маълум қилинишича, соат 18:45 да Mercedes-Benz Low Floor русумли автобусда ёнғин содир бўлган.
Қайд этилишича, ушбу автобус 2012 йилда ишлаб чиқарилган. Ҳолат 4-автобус саройи тасарруфидаги 143-сонли йўналишда ҳаракатланувчи автобусда содир бўлган. Дастлабки маълумотга кўра, ҳайдовчи Ф.А. бошқарувидаги автобус, Сергели тумани, Янги Сергели кўчасида ҳаракатланаётган вақтда, автобуснинг электр кабелларининг қисқа туташуви оқибатида ёнғин юзага келган. Ҳайдовчи ёнғинни ўчириш учун бирламчи ўт ўчириш мосламаси орқали дастлабки чоралар кўришига қарамай, ёнғин алангага айланган. Шундан сўнг, воқеа жойига ФВВ Ёнғин қутқарув бўлинмаси тезкор гуруҳи чақирилиб, ёнғин қисқа вақтда бартараф этилган. Мазкур ҳодиса ортидан тан жароҳати олганлар йўқ, автобусга техник зарар етган.
Шу билан бирга, 6 апрель куни соат 21:55да 8-автобус саройи филиали тасарруфидаги Mercedes-Benz русумли 169-сонли- йўналишда ҳаракатланувчи автобусда ҳам ёнғин содир бўлган. Мазкур автобус 2012 йилда ишлаб чиқарилган бўлиб, автобус Қибрай туманидаги “Қашқарлик” бекатида йўналиш бўйлаб ҳаракатланиш вақтида мотор қисмида электр симларининг қисқа туташуви оқибатида туташ ҳолати юзага келган.
Автобус ҳайдовчиси А.У. ушбу ҳолатни кўриб, тезкор чоралар кўрган ва туташ ҳолатини бартараф қилган. Ушбу ҳодиса оқибатида тан жароҳати олганлар йўқ, автобус техник шикастланган.
