Тошкент шаҳрининг Учтепа туманида йўл талашиб, аёл кишини ҳақорат қилган ҳайдовчи 15 суткага қамалди. Бу ҳақда пойтахт Ички ишлар бош бошқармаси хабар берди.
“Қизимни боғчага ташладим. Секин орқага юриб чиқаётган эдим. Бу киши маҳалла ичида, иккита боғча бор йўлда босиб келаётган эканлар. Мен нима хато қилган эканман деб, машинамни четга олиб тушдим. Орқага юрганимда ҳам менинг орқамдан юриладиган йўл бор эди. Бу инсон ўтиб кетса бўларди. Бундан баттар сўкинишлар бўлган, бундан баттар ҳақоратлар, телефонимни қўлимдан юлиб олиб, телефонни бермасликлар бўлган. Мен эрталабдан бери титраб, ўзимга кела олмаяпман”, дейди жабрланувчи.
Билдирилишича, мазкур ҳолат юзасидан жамоат жойида уятли сўзлар билан сўкиниб, жамиятда юриш-туриш қоидаларини қасддан бузган шахсга нисбатан Учтепа тумани Ички ишлар органлари фаолиятини мувофиқлаштириш бошқармаси томонидан Маъмурий жавобгарлик тўғрисидаги кодекснинг 183-моддаси (майда безорилик) аломатлари билан маъмурий баённома расмийлаштирилган ҳамда тўпланган ҳужжатлар белгиланган тартибда Жиноят ишлари бўйича туман судига тақдим этилган.
Шундан сўнг эркакка Маъмурий жавобгарлик тўғрисидаги кодексининг 183-моддаси билан 15 сутка маъмурий қамоқ жазоси тайинланган.
“Мен кечирим сўрайман. Бунақа нарса бошқа қайтарилмайди. Ҳурмат қилиб юраман. Кейинги сафар жаҳлни уйда жиловлаб, тўғри қилиб, кейин кўчага чиқишни ўрганаман. Бунақа нарса бошқа бўлмайди”, дейди эркак.
Маълум бўлишича, ушбу ҳодисадан кейин жабрланувчи аёлга ҳимоя ордери берилган.
