Сирдарё вилоятида давлат рақамисиз ҳаракатланган ва ЙПХ ходимининг қонуний талабига бўйсунмаган Nexia-3 ҳайдовчиси қўлга олинди. Бу ҳақда вилоят ИИБ ахборот хизмати хабар берди.
Маълум қилинишича, 7 май куни Янгиер шаҳри ҳудудида хизмат олиб борган ЙҲХХ инспекторлари қўпол қоидабузарлик содир этиб ҳаракатланган Nexia-3 автомобилига тўхташ ишорасини берган. Бироқ ҳайдовчи талабга бўйсунмасдан қочишга уринган.
Қайд этилишича, автомобил ҳаракати давомида хизмат машинасига шикаст етказган ҳамда бошқа йўл ҳаракати иштирокчиларининг ҳаёти ва соғлиғига хавф туғдирган.
Шундан сўнг ҳайдовчининг ҳаракатлари оғир оқибатларга олиб келишининг олдини олиш мақсадида “тўсиб ушлаш” режаси амалга оширилган. Натижада Nexia-3 юк автомашинасига урилиб, ҳаракатдан тўхтаган.
ИИБ маълумотига кўра, ҳайдовчи шундан кейин ҳам ҳуқуқни муҳофаза қилувчи орган ходимларининг қонуний талабларига бўйсунмаган ва фаол қаршилик кўрсатган. У қўлга олинган. Машинада ҳайдовчидан ташқари яна бир йўловчи бўлган.
Ҳолат юзасидан Жиноят кодексининг 219-моддаси 2-қисми (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилган. Ҳайдовчи тегишли тартибда ушланган, тергов ҳаракатлари давом этмоқда.
