Исроил Фуқаролик маъмурияти босиб олинган Шарқий Қуддусдаги Ал-Ақсо масжидида жума намозини бекор қилди. Бу ҳақда Al Jazeera хабар берди.
Бу қарор Рамазон ойи бошланганидан бери Исроил томонидан Исломнинг учинчи муқаддас масканига қўйилган навбатдаги чеклов ҳисобланади. Фуқаролик маъмурияти раҳбари бригада генерали Ҳишам Иброҳим чеклов Эроннинг “Исроил ва бутун минтақага” қарши жавоб зарбалари сабабли қабул қилинганини айтди. Исроил ва унинг яқин иттифоқчиси бўлган АҚШ 28 февраль куни Эронга қарши ҳарбий операция бошлади.
“Қуддуснинг Эски шаҳридаги барча муқаддас масканлар — Ғарбий девор, Маъбад тоғи ва Муқаддас қабр черкови эртага ёпиқ бўлади. Барча дин вакилларига ибодат қилиш ёки ташриф буюришига рухсат берилмайди”, деди Исроилнинг босиб олинган Ғарбий соҳилни бошқарувчи органи раҳбари.
Ҳозиргача Эроннинг жавоб ракета зарбалари Исроилда 10 кишининг ўлимига сабаб бўлган, Исроил ва АҚШнинг Эронга берган зарбалари эса камида 1 230 кишининг ҳалок бўлишига олиб келган.
Эронга қарши уруши бошланганидан буён Исроил ҳукумати Эски шаҳарга у ерда яшовчилар ва дўкон эгаларидан бошқаларнинг киришини тақиқлаб қўйди. Ал-Ақсо масжидининг катта имомларидан бири шайх Икрима Сабри эса Исроилнинг бу қарорини кескин танқид қилди.
“Босқинчи ҳокимият Ал-Ақсони ёпиш учун ҳар қандай вазиятдан фойдаланмоқда. Бу мутлақо асоссиз”, деди у Al Jazeera телеканалига.
Бироқ Исроил томонидан қўйилаётган чекловлар уруш бошланишидан олдин ҳам мавжуд эди. Февраль ойида Исроил ҳукумати мусулмонлар учун муқаддас рамазон ойи арафасида Ал-Ақсо масжидга киришни тақиқлаган.
Эски шаҳар босиб олинган Шарқий Қуддусда жойлашган. Исроил бу ҳудудни 1967 йилда босиб олиб, кейинчалик халқаро ҳуқуққа зид равишда аннексия қилган. Сўнгги йилларда бу ҳудуд ўнг қанот Исроил сиёсатчилари ва яҳудий кўчманчиларининг тез-тез ташриф буюрадиган жойига айланди. Улар деярли ҳар ҳафта мажмуага кириб, Исроил хавфсизлик кучлари ҳимояси остида диний маросимлар ўтказади.
Фаластинликлар муқаддас маскан устидан Исроилнинг назорати тобора кучайиб бораётганидан хавотирда. Ал-Ақсо мажмуаси Иордания томонидан бошқарилади, бироқ масканнинг ўзига кириш Исроил хавфсизлик кучлари назорати остидадир.
Исроил ҳукумати томонидан ўнлаб йиллар давомида сақланиб келинаётган статус-квога кўра, яҳудийлар ва бошқа мусулмон бўлмаганларга белгиланган соатларда Шарқий Қуддусдаги мажмуага киришга рухсат берилади. Лекин уларга ибодат қилиш ёки диний рамзларни намойиш этиш тақиқланади.
Исроил миллий хавфсизлик вазири Итамар Бен-Гвир бир неча бор Ал-Ақсо масжиди мажмуасида яҳудийларнинг ибодат қилиш ҳуқуқини талаб қилиб, амалдаги статус-квога қарши чиққан. 2024 йилда у масжид мажмуасида синагога қуришини айтган эди.
