Исроил мудофаа вазири “Ҳизбуллоҳ” жанубий Ливанда “ўт билан ўйнаётгани”ни айтиб, ҳарбий амалиётларни янада кучайтириш билан таҳдид қилди. Исроил Кац бу ҳақда бугун, 2 ноябр кунги баёнотида маълум қилди.
“Ҳизбуллоҳ” манзилига йўлланган бу огоҳлантириш Ливаннинг Набатия туманига берилган авиазарбадан бир кун ўтиб янгради. Исроил ҳарбий ҳаво кучлари ҳужуми сабаб тўрт киши ҳалок бўлди. Ливан соғлиқни сақлаш вазирлиги маълумотига кўра, ўлдирилганлар орасида “Ҳизбуллоҳ” жангчилари ҳам бор.
Al Arabiya телеканалининг Исроил мулозимларига таяниб хабар беришича, “Ҳизбуллоҳ” яҳудий давлати билан уруш давомида йўқотилган қудратини тиклай бошлаган. Ливан қуролли ҳаракати Сурия орқали юзлаб қисқа масофали ракеталарни яширинча олиб кирган.
“Ҳизбуллоҳ” томонидан ўтказилган дафн маросими
Фото: AFP
“Ҳизбуллоҳ” ўз жанговар салоҳиятини яна тиклаётгани ҳақидаги даъволарга The Wall Street Journal ҳам эътибор қаратди. Нашрнинг Исроил ва араб махсус хизматларидаги манбаларига кўра, ташкилот Эрон ёрдами билан ракеталар, танкка қарши қуроллар ва артиллерия захираларини тўлдиряпти.
Манбага кўра, Исроил Ливан ҳукумати орқали огоҳлантириш юбориб, “Ҳизбуллоҳ”ни қуроллардан воз кечишга чақирган. Яҳудий давлати, бу талаб бажарилмаган тақдирда, пойтахт Байрут жанубидаги маҳаллалар яна бомбардимон қилинишини айтган.
“‘Ҳизбуллоҳ’ни қуролсизлантириш ва жанубий Ливандан олиб чиқиш ҳақидаги мажбурият бажарилиши керак. Биз шимолий вилоятлар хавфсизлигига таҳдид солишларига асло йўл қўёлмаймиз”, деган Исроил мудофаа вазири.
Исроил бош вазири Бенямин Нетаньяху ҳам “Ҳизбуллоҳ”ни қайта қуролланишда айблади.
“Ливан ҳукумати ўз мажбуриятини бажариши керак. Акс ҳолда, биз ўз мудофаа ҳуқуқимиздан фойдаланамиз”, деган у ҳукумат йиғилишида.
Исроил ва “Ҳизбуллоҳ” қуролли тўқнашувларнинг бир неча ой давом этган фаол босқичидан сўнг 2024 йилнинг ноябрь ойида оташкесимга келишган. Шунга қарамай, яҳудий давлати Ливан жанубига зарбаларини тўхтатгани йўқ. Сўнгги кунларда эса уларни янада кучайтирди.
Ливан президенти Жозеф Аун Исроилнинг бу ҳужумларини “сулҳ шартларини бузиш” деб атаб, армияга ҳудудий яхлитлик бузилишига жавобан чора кўришни буюрди.
