Россия армияси сафида Украинага қарши жанг қилиб асирга тушган икки нафар Шимолий Корея аскари украиналиклардан уларни Сеул ихтиёрига топширишни сўраган. Бу ҳақда Германиянинг Deutsche Welle нашри хабар қилди.
Улар бу ҳақда ҳужжатли фильм учун интервью вақти илтимос қилган. Суҳбат Жанубий Кореянинг Gyeore-eol Nation United инсон ҳуқуқлари ташкилоти иштирокида ўтказилган. Кейинроқ маълум бўлишича, асирлардан бири жорий йилнинг февраль ойида Жанубий Корея Миллий ассамблеяси вакилига ҳам шундай илтимос билан мурожаат қилган.
Украина ва Ғарб разведка хизматларнинг маълум қилишича, Пхеньян Россия армиясини қўллаб-қувватлаш учун 2024 йилда 10 мингга яқин аскар юборган. Жанубий Корея расмийларига кўра, уларга асирга тушмаслик учун ўз жонига қасд қилиш буйруғи берилган. Яраланганлар эса граната билан ўзларини портлатишга мажбур қилинади.
Пхеньян, бундан ташқари, Россияни қурол-яроғ ва ҳарбий техникалар билан ҳам таъминлаб келади. Украина ҳарбий разведкаси раҳбари Крилл Будановга кўра, рус армияси уруш эҳтиёжлари учун ўқ-дориларнинг 40 фоизини Шимолий Кореядан олади.
