Жаҳон банки Афғонистон борасида янги ҳисобот эълон қилди. Унда “Толибон” 2025-молиявий йилнинг дастлабки етти ойида умумий бюджетнинг 49 фоизини хавфсизлик соҳасига сарфлагани қайд этилди. Бу ҳақда Afghanistan International хабар берди.
Ҳисоботга кўра, умумий харажатлар 18,5 фоизга ошиб, 155,7 миллиард афғонийга етган. Шундан қарийб 75,6 миллиард афғоний хавфсизлик масалаларига сарфланган.
Иқтисодиёт заифлашмоқда
Жаҳон банки ўз ҳисоботида Афғонистон иқтисодиётини заиф деб атаган. Зилзилалар, қурғоқчилик, қочқинларнинг қайтиши ва телекоммуникация хизматларидаги узилишлар Афғонистоннинг заифлик даражасини оширган. Шу билан бирга, ҳисоботда “Толибон” ҳукуматининг 2025-йилда ички даромадлари ўтган йилнинг шу даврига нисбатан 16 фоизга ошгани ҳам қайд этилган.
Экспортнинг ўсиши
Маълумотларга кўра, Покистон билан чегара ёпилганига қарамай, Афғонистон экспорти 2025-йилнинг октябрь ойида ўтган йилнинг шу даврига нисбатан 13 фоизга, бутун 2024-йилга нисбатан эса 3,7 фоизга ўсган. Ҳисобот даврида Афғонистон экспорти 267 миллион долларга етган.
Ўсишнинг сабаби Афғонистоннинг Ҳиндистон ва Ўзбекистонга амалга оширган экспортлари билан изоҳланган. Ҳисоботда жумладан, шундай дейилади:
“Чегара можаролари туфайли Покистон билан савдо тўхтатилганига қарамай, Ҳиндистон ва Ўзбекистонга экспорт муваффақиятли амалга оширилди”.
Маълум қилинишича, ҳосил йиғиш мавсумининг авжи ва нисбатан паст ички инфляция рақобатбардошликни янада кучайтириб, Покистон йўналишидаги йўқотишларни қоплашга ёрдам берган.
Озиқ-овқат экспорти октябрь ойида 238,4 миллион долларга етган, бу 2024-йилга нисбатан 8,6 фоизга кўп бўлиб, минтақавий талаб юқорилигини акс эттиради. Покистон ва “Толибон” ўртасидаги сўнгги тўқнашувлардан сўнг Исломобод чегара пунктларини ёпиб қўйган ва икки давлат ўртасидаги савдо ва транзит бир ойдан ортиқ вақтдан бери тўхтаб қолган.
Айни пайтда, Покистон савдо йўлларини қайта очиш учун шартлар қўйган. “Толибон” эса Исломобод билан ўтиш жойларининг ёпилиши Афғонистондаги савдога салбий таъсир кўрсатмаганини айтмоқда.
