Кеча, 7 январь куни АҚШ президенти 1,5 триллион долларлик ҳарбий бюджет Вашингтонга «орзудаги ҳарбий кучларини» яратиш имконини беришини айтди. Фақат бюджет АҚШ Конгресси томонидан тасдиқланиши керак. Бу ҳақда Дональд Трамп “TruthSocial” ижтимоий тармоғида маълум қилди.
Келтирилишича, АҚШнинг 2027 йил учун ҳарбий бюджети 1,5 триллион долларга (1,3 триллион евро) етиши кутилмоқда. Ушбу сумма Конгресс томонидан 2026 йил учун тасдиқланган 901 миллиард доллардан (771 миллиард евро) сезиларли даражада ортганини кўрсатмоқда.
Трамп бу қарорни «сенаторлар, конгрессменлар, котиблар ва бошқа сиёсий вакиллар билан узоқ ва қийин музокаралардан сўнг» қабул қилганини айтди. Оқ уй раҳбари бу қадам Вашингтонга «орзудаги ҳарбий куч»ни яратиш ва «хавфсизлик ва ҳимоя»ни таъминлаш имконини беришини билдирди.
Шунингдек, у Қўшма Штатлар миллий қарзни камайтиришда давом этиши ва «ўртача даромадли» америкаликларга дивидендлар тўлашига ишонч билдирди.
Маълумотларга кўра, АҚШ бошқа давлатларга нисбатан ҳарбий эҳтиёжларга кўпроқ маблағ сарфламоқда. Аввалроқ ,Трамп ижтимоий тармоқларда Вашингтоннинг НАТОдаги иттифоқчиларининг садоқатига шубҳа билдирган эди.
Шу билан бирга, Федерал бюджет қўмитаси партиясиз таҳлил маркази Трампнинг таклифларини амалга ошириш учун 2035 йилга келиб, 5 триллион доллар (4 триллион евро) керак бўлишини ва АҚШ миллий қарзига 5,8 триллион доллар (4,9 триллион евро) қўшилишини айтмоқда.
