Саудия Арабистони пойтахти Ар-Риёд шаҳрида жойлашган АҚШ элчихонаси ҳудудида портлашдан кейин ёнғин чиқди. Бу ҳақда “Reuters” агентлиги хабар берди.
N12 телеканали Telegram саҳифасида юқори лавозимли америкалик амалдорга таяниб, Саудия Арабистонидаги АҚШ элчихонаси эҳтимол дрон ёрдамида ҳужумга учраганини маълум қилган.
Кейинроқ мамлакат Мудофаа вазирлиги Х ижтимоий тармоғидаги баёнотида, дастлабки маълумотларга кўра, дипломатик ваколатхона икки учувчисиз учиш қурилмаси билан нишонга олинган ва шундан сўнг кичик ёнғин юз берган. Вазирлик маълумотига кўра, етказилган зарар катта эмас.
“Fox News” мухбири Женнифер Гриффин Х тармоғида манбага таяниб ёзишича, ҳужум эҳтимол Эрон дронлари томонидан амалга оширилган. Воқеа пайтида элчихонада ҳеч ким бўлмаган ва жабрланганлар йўқ. Эрон учувчисиз қурилмалари зарбаси ҳақида CNN ҳам хабар берган.
Элчихона ўз баёнотида Жидда, Ар-Риёд ва Дахрон шаҳарларидаги америкаликларни “зудлик билан турган жойида паноҳ топиш” ва минтақадаги ҳар қандай ҳарбий обектларга сафар қилмасликка чақирган.
2-март куни Қувайтдаги АҚШ дипломатик ваколатхонаси биноси устида тутун кўтарилгани ҳақида “Reuters” хабар берган эди. Кейинроқ элчихона Қувайт ҳудудида “ракета ва дрон ҳужумлари доимий таҳдиди” мавжудлигини билдириб, ходимлар хавфсиз жойда эканини маълум қилган.
