Бугун, 19 февраль куни “Тинчлик кенгаши” йиғилишида АҚШ Президенти Дональд Трамп номидаги мукофотни яратиш таклифи билдирилди. Ушбу ташаббус Қозоғистон Президенти Қосим-Жомарт Тўқаев томонидан илгари сурилди.
“Мен Президент Трампнинг тинчликпарварлик соҳасидаги улкан ютуқларини эътироф этиш учун унинг номидаги махсус “Тинчлик кенгаши” мукофотини таъсис этишни таклиф қилмоқчиман”, деган Тўқаев.
Тинчлик Кенгаши – бу 2026 йил январь ойида АҚШ Президенти Дональд Трамп ташаббуси билан ташкил этилган халқаро тузилма бўлиб, Ғазо секторида бошқарувни ўз зиммасига олиш ва глобал можароларни ҳал қилиш учун мўлжалланган. Ташкилот, амалда, АҚШ назорати остида, иштирок этишга таклиф қилинган давлат раҳбарларидан иборат ва доимий аъзолик учун 1 миллиард доллар миқдорида маблағ талаб қилади. “Тинчлик кенгаши” Бирлашган Миллатлар Ташкилотига потенциал муқобил ёки рақобатчи сифатида қаралади.
