Тошкент шаҳридаги “Роҳат” меҳмонхонасида аёл ҳамкасбининг хонасига кириб, унга нисбатан шаҳвоний шилқимлик қилган 25 ёшли банк ходими 5 суткага қамалди.
Суд ҳужжатларида қайд этилишича, ҳодиса 2025 йил 18 декабрдан 19 декабрга ўтар кечаси Чилонзор туманидаги меҳмонхонада юз берган. Томонлар банк тизимида ишлаши ва хизмат сафари билан Тошкентга келгани айтилган.
Жабрланувчи кўрсатмасига кўра, эркак унинг хонасига кириб, аввал бирга овқатланишни таклиф қилган. Бир оз вақт ўтгач, унга жинсий алоқа қилишни таклиф этган. Аёл рад жавобини берганидан сўнг йигит уни ўпишга ва қучоқлашга уринган.
Аёл қаршилик кўрсатиб, хонани тарк этишини талаб қилган. Айбланувчи бунга қулоқ солмай, аёлни ёстиқ билан бўғган. Шунда жабрланувчи М.И. бақириб қаршилик кўрсатган, у хонадан чиқиб кетмоқчи бўлган вақтида У.О. уни хонадан чиқишига қўймаган.
Суд мажлисида фуқаро айбини қисман тан олиб, жабрланувчи билан таниш эканини, унга овқат олиб келгани ва қучоқлаш мақсадида қўл узатганини билдирган. Бироқ суд жабрланувчининг кўрсатмалари ва иш материаллари билан ҳуқуқбузарлик тасдиқланганини қайд этди.
Суд қарорига мувофиқ, эркак 5 сутка маъмурий қамоқ жазосига ҳукм қилинди. Жазо 2026 йил 18 февралдан бошлаб ҳисобланади. Шунингдек, маъмурий қамоқни сақлаш билан боғлиқ харажатлар учун ундан 309 минг сўм ундирилиши белгиланди.
