Тошкентда икки кишининг ўлимига сабаб бўлган ЙТҲ ҳодисасини содир қилган ҳайдовчига суд ҳукми ўқилди. Бу ҳақда Олий суд матбуот хизмати хабар қилди.
Қайд этилишича, 2025 йилнинг 31 август куни Янгиҳаёт туманида ҳайдовчи бир неча йўл ҳаракати қоидаларини бузган ҳолда юқори тезликда ҳаракатланиб, темир устунга урилган. Оқибатда 24 ёшли йигит ва 17 ёшли қиз ҳалок бўлган. Ушбу йигит ва қизнинг тўйи бўлиши керак бўлган.
“Дўстликка ташлаб қўйишни илтимос қилишган. Уйдагиларим телефон қилишаётган эди, кеч бўлиб кетганига сал тезроқ юрганман, авария бўлиб кетди. Мен эслай олмайман, ўзим ҳам машинанинг ичида бўлганман. Кўзимни очганимда ерда ётган эдим”, деган қонунбузар.
Айбланувчи автомобильни яқинда сотиб олган. Айбланувчининг отаси судда автомобильни қарзларини ёпиш мақсадида олганини маълум қилди.
Суд жараёнида марҳумларнинг яқинлари айбланувчига нисбатан даъвоси йўқлигини билдириб, унга енгилроқ жазо тайинланишини сўрашди. Суд ҳолатни тўлиқ ўрганиб, йигитни саккиз йил муддатга озодликдан маҳрум этиш, шунингдек, уч йил давомида транспорт воситасини бошқариш ҳуқуқидан маҳрум қилиш тўғрисидаги ҳукмни чиқарди.
Аввалроқ Навоий вилояти Томди туманида Зарафшон—Навоий йўналиши бўйлаб ҳаракатланаётган автобус йўл-транспорт ҳодисасига учраб, икки фуқаро олган тан жароҳатлари туфайли воқеа жойида вафот этганди.
