Фарғона вилоятининг Бешариқ туманида вояга етмаган ака-ука сувда чўкиб кетиб ҳалок бўлди. Бу ҳақда Бош прокуратура ахборот хизмати раҳбари Ҳаёт Шамсутдинов маълум қилди.
Воқеа 19 март куни содир бўлган. 8 ёшли З.С. ва унинг 6 ёшли укаси З.С. ўз эҳтиётсизлиги оқибатида “Булоқбоши” МФЙда жойлашган сув тақсимлагич омборига тушиб кетиб, вафот этган. 6 ёшли бола сув тақсимлагич омбори ҳудудида ўйнаб юрган вақтида қўлидаги ўйинчоғи сувга тушиб кетган. Уни олиш учун сувга тушган ва ўзини бошқара олмай сувга чўкиб кетган. Унинг акаси укасини қутқариш учун ўзини сувга ташлаган. Оқибатда хар иккиси сувда димиқиб, ҳодиса жойида вафот этган.
Болалар уйга қайтмаганидан сўнг отаси уларни қидирган ва канал ҳудудида болалар чўкиб кетганини кўрган. ФВВ қутқарув хизмати томонидан мурдалар сувдан олиб чиқилган. Мурдалар ташқи кўздан кечирилганида танасида тан жароҳатлари ва улардан қолган излар аниқланмаган. Судга оид тиббий экспертизанинг дастлабки маълумотномасида вояга етмаган болалар ўлимига “нафас йўлларининг сув билан беркилиши натижасида мехник асфиксия” сабаб бўлгани кўрсатилган.
Ҳозирда мазкур ҳолат юзасидан Бешариқ туман прокуратураси томонидан терговга қадар текшириш ҳаракатлари олиб борилмоқда ва текширув ҳаракатлари назоратга олинган.
