Наманган вилояти Чортоқ туманида эрини фарзандлари кўз ўнгида пичоқлаб ўлдирган аёлга суд ҳукми ўқилди. “Дарё” мухбири ушбу ҳолат билан боғлиқ суд ҳужжатларини ўрганди.
1989-йилда туғилган Саодат (исм-шарифлар ўзгартирилган) 2009-йилда Нодир исмли йигит билан оила қурган. Ўн тўрт йиллик турмуш давомида улар уч нафар фарзандни дунёга келтирган.
Саодат Telegram мессенжери орқали Элмурод, Мусахон ва Самандар исмли эркаклар билан танишиб, улар билан яширинча ёзишиб юради.
Жорий йилнинг 28 февраль тунги соат 2:30 ларда Нодир Саодатнинг телефонига келган “SMS”дан уйғониб кетади. Телефонни очиб кўрганида, у ерда бегона эркакларнинг хотинига “алло, ухлаб қолдизми”, “саломга алик омасакансизде” (смс хабарлар суд ҳужжатларида келтирилганидек таҳрирсиз берилмоқда — таҳр.) мазмунида ёзилган хабарларига кўзи тушади. Бундан ғазабланган Нодир турмуш ўртоғини уйғотиб, хабарлар бўйича изоҳ сўрайди. Иккисининг ўртасида юзага келган жанжал оқибатида фарзандлари уйғониб, ота-онасини юмшатишга уринишади.
Бироқ ғазабдан тушмаган Нодир хотини билан ажрашишини, бегона эркаклар билан ёзишганини қариндошларига айтишини ва уйдан ҳайдашини билдиради. Саодат қариндош-уруғлар ичида шарманда бўлишдан қўрқиб, хонадон токчасида турган ошхона пичоғини олади ва фарзандларининг кўз ўнгида турмуш ўртоғининг қорни, кўкраги ва орқа қисмларига санчиб олади. Нодир кўп қон йўқотиши оқибатида воқеа жойида ҳалок бўлади. Онасининг қўлидан пичоқни тортиб олишга уринган фарзандлардан бири ҳам жароҳат олади.
Жиноят ишлари бўйича Чортоқ туман судининг ҳукми билан Саодат Тошпўлатова Жиноят кодексининг 97-моддаси (қасддан одам ўлдириш) 2-қисми “ж” банди билан айбли деб топилиб, унга нисбатан 10 йил муддатга озодликдан маҳрум қилиш жазоси тайинланди.
